សទា្ទនុក្រមបរធនបាលកិច្ច

កាលាវសាន

កាលបរិច្ឆេទកំណត់ក្នុងការទូទាត់សេវាបំណុល។

កាលានុវត្តភាព

មានន័យថាកាលៈទេសៈដ៏សមគួរ ឬដំណើរវិវឌ្ឍត្រូវពេលវេលា ឱកាសដែលអនុគ្រោះសម្រាប់ចាប់យកប្រយោជន៍អំពីកិច្ចការអ្វីមួយ ឬគុណសម្បត្តិអ្វីមួយដែលកំពុងលេចឡើង។ ក៏ប៉ុន្តែការទាញយកប្រយោជន៍នោះ គឺអាចប្រឈមនឹងហានិភ័យ ហើយចំាបាច់ត្រូវបេ្តជ្ញាចិត្តយ៉ាងមុតមាំ និងមានធនធានគ្រប់គ្រាន់ទើបគេអាចទាញយកប្រយោជន៍នោះបាន។

កាលបរិច្ឆេទស្ថាពរ

សំដៅដល់ពេលវេលាកំណត់ជាក់លាក់ទុកជាបានការ ដែលភាគីមិនអាចកែប្រែនៅពេលក្រោយបាន។

ការអះអាងដោយបំភាន់

សំដៅដល់ការអះអាងមួយដែលបុគ្គលកំពុងធ្វើសកម្មភាពធុរកិច្ចណាមួយធ្វើឱ្យអ្នកប្រើប្រាស់ជឿថាអ្វីមួយពិត ប៉ុន្តែជាក់ស្តែងមិនមែនជាការពិត។

ការស្រូបយក ឬការចាប់យកឌីជីថល

ស្ថានភាពដែលមនុស្សមានជំនាញក្នុងការប្រើប្រាស់ឧបករណ៍អេឡិចត្រូនិក ប្រព័ន្ធបច្ចេកវិទ្យាព័ត៌មាន និងថ្នាលឌីជីថលតាមបំណង និងឱ្យអស់លទ្ធភាព។

ការសិក្សាសមិទ្ធិលទ្ធភាព

គឺជាការវាយតម្លៃយ៉ាងល្អិតល្អន់ និងស៊ីជម្រៅលើគម្រោងវិនិយោគមួយ ដើម្បីកំណត់ភាពអាចទៅរួច បច្ចេកទេស ហិរញ្ញវត្ថុ សេដ្ឋកិច្ច ច្បាប់ និងផលប៉ះពាល់បរិស្ថាន-សង្គម មុនពេលសម្រេចចិត្តវិនិយោគ។

ការសម្អាតប្រាក់និងហិរញ្ញប្បទានភេរវកម្ម

គឺជាបទល្មើសព្រហ្មទណ្ឌដែលពាក់ព័ន្ធនឹងការបំប្លែង ឬផ្តល់មូលនិធិពីប្រភពមិនស្របច្បាប់ ដើម្បីបិទបាំងប្រភពដើមនៃទ្រព្យសម្បត្តិ ឬគាំទ្រសកម្មភាពភេរវកម្មដែលត្រូវបានហាមឃាត់តាមច្បាប់ និងត្រូវបានទប់ស្កាត់យ៉ាងតឹងរ៉ឹង។

ការសម្អាតប្រាក់

សំដៅដល់៖ ក- ការបំប្លែងឬការផ្ទេរទ្រព្យសម្បត្តិ ដោយមិនដឹងថាទ្រព្យសម្បត្តិនេះជាផលនៃបទល្មើសក្នុងគោលបំណងបិទបាំង ឬក្លែងប្រភពដើមមិនស្របច្បាប់នៃទ្រព្យសម្បត្តិទាំងនេះ ឬជួយបុគ្គលណាមួយដែលបានពាក់ព័ន្ធក្នុងបទល្មើស ដើម្បីឱ្យបុគ្គលនោះគេចផុតពីផលវិបាកតាមផ្លូវច្បាប់នូវសកម្មភាពរបស់ខ្លួន។ ខ- ការបិទបាំងឬការក្លែងសភាវៈពិត ប្រភព ទីតាំង សិទ្ធិចាត់ចែង ចលនា ឬកម្មសិទ្ធិ ឬសិទ្ធិលើទ្រព្យសម្បត្តិ ដោយដឹងថាទ្រព្យសម្បត្តិទាំងនេះបានមកពីបទល្មើស។ គ- ការធ្វើលទ្ធកម្ម ការកាន់កាប់ ឬការប្រើប្រាស់ទ្រព្យសម្បត្តិ ដោយដឹងថាទ្រព្យសម្បត្តិទាំងនេះបានមកពីបទល្មើស។ ឃ- ការចូលរួម ការប៉ុនប៉ងប្រព្រឹត្ត ដោយជួយនិងជំរុញឱ្យប្រព្រឹត្តសកម្មភាពណាមួយដែលបានកំណត់។

ការសម្រុះសម្រួលដោះស្រាយបណ្តឹង

ដំណើរការនៃការស្វែងរកដំណោះស្រាយមួយសមស្របដោយអនុលោមច្បាប់ និងលិខិតបទដ្ឋានគតិយុត្តជាធរមាន។

ការសម្របឌីជីថល

សមត្ថភាពរបស់មនុស្សក្នុងការយល់ដឹង និងការសម្របខ្លួនទៅតាមការវិវឌ្ឍឥតឈប់ឈររបស់បច្ចេកវិទ្យាឌីជីថលដែលចាក់ជ្រៅនៅក្នុងធុរកិច្ច សេដ្ឋកិច្ច និងសង្គម។

ការសម្គាល់អតិថិជនឌីជីថល

ការប្រើប្រាស់បច្ចេកវិទ្យាឌីជីថលដើម្បីបង្កើត និងកំណត់អត្តសញ្ញាណរបស់អតិថិជនក្នុងពិភពឌីជីថលតាមប្រព័ន្ធអេឡិចត្រូនិកដោយពឹងផ្អែកលើឯកសារសម្គាល់។

ការវាយតម្លៃសំណើហិរញ្ញវត្ថុ

សំដៅដល់ការពិនិត្យ និងការវាយតម្លៃទៅលើបញ្ជីប៉ាន់តម្លៃនៃសំណើបច្ចេកទេសដែលមានសុពលភាព និងឆ្លើយតបទៅនឹងលក្ខណៈបច្ចេកទេស។

ការវាយតម្លៃភាពអនុលោម

សំដៅដល់សកម្មភាពណាមួយដែលពាក់ព័ន្ធនឹងការកំណត់ដោយផ្ទាល់ឬដោយប្រយោលថា ការតម្រូវដែលពាក់ព័ន្ធទាំងឡាយត្រូវបានបំពេញ។

ការលាតត្រដាងព័ត៌មាន

សំដៅដល់ការបង្ហាញព័ត៌មានគ្រប់គ្រាន់និងត្រឹមត្រូវដល់សាធារណជន។

ការលក់ឡាយឡុង

សំដៅដល់ការលក់ដោយដេញថ្លៃនូវវត្ថុដែលរឹបអូស។ តាមរយៈការលក់នេះ បុគ្គលគ្រប់រូបអាចក្លាយជាលទ្ឋករនៃវត្ថុដែលដាក់លក់ឡាយឡុង កាលណាគេបានឱ្យថ្លៃខ្ពស់ជាងគេ ក្នុងកាលបរិច្ឆេទនៃការលក់ឡាយឡុង។ នៅក្នុងក្រមនីតិវិធីរដ្ឋប្បវេណី ការលក់ឡាយឡុងអាចធ្វើឡើងដោយស្រោមសំបុត្រ ឬដោយផ្ទាល់មាត់។

ការលក់សរុប

សំដៅដល់វិធាននៃការលក់អចលវត្ថុដែលរឹបអូស។ វិធានការនេះ ប្រើប្រាស់ក្នុងនីតិវិធីអនុវត្តដោយបង្ខំសម្រាប់ការលក់ឱ្យស្រេចតែម្ដងនូវអចលនវត្ថុរឹបអូសដែលមានច្រើន ក្នុងគោលបំណងលក់ឱ្យបានថ្លៃខ្ពស់ ដើម្បីជាផលប្រយោជន៍ដល់ម្ចាស់បំណុលផង និងកូនបំណុលផង។

ការរួមបញ្ចូលគ្នានៃធុរកិច្ច

គឺជាដំណើរការដែលក្រុមហ៊ុនចាប់ពីពីរ ឬច្រើនបញ្ចូលគ្នាជាអង្គភាពសេដ្ឋកិច្ចតែមួយ ដើម្បីពង្រីកវិសាលភាព កាត់បន្ថយការប្រកួតប្រជែង ឬបង្កើនប្រសិទ្ធភាពប្រតិបត្តិការ។

ការរឹបអូស

សំដៅលើ៖ ១. ការដកហូតជាអចិន្ត្រៃយ៍នូវទ្រព្យសម្បត្តិណាមួយ តាមរយៈសេចក្ដីសម្រេចរបស់តុលាការ ២. ការរឹបអូសតាមគ្រប់មធ្យោបាយ និងការលក់ទ្រព្យសម្បត្តិអ្នកជាប់ពន្ធដោយរដ្ឋបាលសារពើពន្ធ តែមិនត្រូវរឹបអូសទ្រព្យសម្បត្តិឱ្យហួសពីបំណុលពន្ធ និងចំណាយក្នុងការប្រមូលពន្ធឡើយ ៣. ការដកហូតសិទ្ធិកាន់កាប់ជាអចិន្ត្រយ៍នូវទ្រព្យរបស់ទៅតាមសេចក្ដីសម្រេចរបស់តុលាការ ឬរបស់អាជ្ញាធរមានសមត្ថកិច្ចផ្សេងទៀត។

ការរំលាយបញ្ចូលគ្នា (Merger and Acquisition)

សំដៅដល់យុទ្ធសាស្រ្តរបស់ក្រុមហ៊ុន ឬនីតិបុគ្គលក្នុងការរំលាយក្រុមហ៊ុនបញ្ចូលគ្នា និងទិញលក់ ក្នុងគោលបំណងសម្រេចបានកំណើនឆាប់រហ័សឬក្នុងគោលបំណងជាក់លាក់ផ្សេងទៀត។

ការមានទ្រព្យសម្បត្តិដោយខុសច្បាប់

កំណើនទ្រព្យសម្បត្តិរបស់បុគ្គលណាម្នាក់ដែលបុគ្គលនោះមិនអាចផ្ដល់ការពន្យល់សមហេតុសមផលនូវការកើនឡើងនៃទ្រព្យសម្បត្តិនេះ ដោយប្រៀបធៀបទៅនឹងចំណូលស្របច្បាប់របស់ខ្លួន។

ការព្រមព្រៀងខ្សែដេក

សំដៅដល់ការព្រមព្រៀងរវាងបុគ្គលដែលធ្វើប្រតិបត្តិការឬអាចធ្វើប្រតិបត្តិការនៅក្នុងកម្រិតស្មើគ្នានៃខ្សែច្រវាក់ផលិតកម្មនិងចែកចាយ។

ការព្រមព្រៀងខ្សែឈរ

សំដៅដល់ការព្រមព្រៀងរវាងបុគ្គលដែលធ្វើប្រតិបត្តិការឬអាចធ្វើប្រតិបត្តិការនៅក្នុងកម្រិតខុសៗគ្នានៅក្នុងខ្សែច្រវាក់ផលិតកម្មនិងចែកចាយ។

ការព្រមព្រៀង

សំដៅដល់គ្រប់ទម្រង់នៃកិច្ចសន្យា កិច្ចព្រមព្រៀង ការរៀបចំឬការយល់គ្នារវាងបុគ្គលនិងបុគ្គល ហើយអាចធ្វើឡើងជាលាយលក្ខណ៍អក្សរ ដោយផ្ទាល់មាត់ ដោយតុណ្ហីភាព ឬដោយរួមបញ្ចូលនូវការសម្របសម្រួលដោយបុគ្គលដែលមានទំនាក់ទំនងដោយផ្ទាល់ឬមិនផ្ទាល់ ហើយដែលកម្មវត្ថុឬអានុភាពនៃទំនាក់ទំនងនោះ៖ ក. បណ្តាលឱ្យមានឥទ្ធិពលលើអំពើរបស់បុគ្គលមួយឬច្រើននៅលើទីផ្សារ ឬ ខ. បង្ហាញពីអំពីឬសកម្មភាពដែលបុគ្គលណាមួយបានសម្រេចរួចហើយ ឬមានគោលបំណងនឹងយកមកអនុវត្តនៅក្នុងទីផ្សារ។

ការពិន័យអន្តរការណ៍

ការពិន័យដោយរដ្ឋបាលជលផល ហើយអាចធ្វើបានតែក្នុងករណីជនល្មើសបានយល់ព្រមបង់ប្រាក់ពិន័យ ស្របតាមទោសប្បញ្ញត្តិដែលមានចែង។

ការផ្សាយពាណិជ្ជកម្ម

សំដៅដល់ការផ្សព្វផ្សាយជាសាធារណៈឬការផ្សព្វផ្សាយទៅកាន់ក្រុមណាមួយក្នុងចំណោមសាធារណជនទោះតាមទម្រង់ណាក៏ដោយ ក្នុងគោលបំណងជំរុញការផ្គត់ផ្គង់ទំនិញ ឬសេវា ឬការលក់ឬការផ្តល់សិទ្ធិប្រត្យក្សលើអចលនទ្រព្យ។

ការផ្ទេរទ្រព្យសកម្ម

ការផ្លាស់ប្តូរភាពជាម្ចាស់កម្មសិទ្ធិនៃទ្រព្យសកម្ម។

ការប្រកួតប្រជែងដោយសុចរិត

សំដៅដល់ការប្រកួតប្រជែងឈរលើមូលដ្ឋានថ្លៃទាប គុណភាពល្អ និងសេវាល្អ ដោយផ្អែកលើគោលការណ៍និរន្តរភាពផ្នែកសេដ្ឋកិច្ចយូរអង្វែងនិងមិនបំពានអំណាចឬជំហរឧត្តមភាពលើទីផ្សារ។

ការប្រកួតប្រជែង

សំដៅលើសកម្មភាពរបស់បុគ្គលធ្វើធុរកិច្ចនៅក្នុងទីផ្សារ ដើម្បីដណ្តើមយកអតិថិជនឱ្យបានច្រើនក្នុងការប្រើប្រាស់នូវទំនិញឬសេវារបស់ខ្លួន ទទួលបាននូវចំណែកទីផ្សារច្រើន និងជំហរឧត្តមភាពលើទីផ្សារ។

ការបញ្ជាពង្រឹងការគ្រប់គ្រងអាជីវកម្ម

សំដៅដល់ការបញ្ជាឱ្យក្រុមហ៊ុនបរធនបាលពង្រឹងការគ្រប់គ្រងនៅពេលអនុបាតមូលធនសុទ្ធរបស់ក្រុមហ៊ុននោះធ្លាក់ក្រោម ១០០ (មួយរយ) ភាគរយ។

ការបញ្ជាក់

សំដៅដល់នីតិវិធីមួយដែលក្នុងនោះ តតិយជនម្នាក់ផ្តល់ការធានាជាលាយលក្ខណ៍អក្សរថាទំនិញ ដំណើរការ ការអនុវត្ត ឬសេវាកម្មសមស្របទៅតាមការតម្រូវដែលបានកំណត់។

ការបង្កកទ្រព្យសម្បត្តិ

សំដៅដល់ការទប់ស្តាត់ការលក់ ការផ្គត់ផ្គង់ ភតិសន្យា ការផ្ទេរ ការបំប្លែង ការធ្វើមត៌កឬអនុប្បទាន ការចល័ត ឬការប្រើប្រាស់ទ្រព្យ។

ការធ្វើអធិការកិច្ច

សំដៅដល់ការត្រួតពិនិត្យ ស៊ើបអង្កេត ស្រាវជ្រាវ ឆែកឆេររបស់មន្រ្តីអធិការកិច្ចបរធនបាលកិច្ច ក្នុងករណីសង្ស័យប្រព្រឹត្តល្មើសនឹងច្បាប់និង/ឬបទប្បញ្ញត្តិក្នុងវិស័យបរធនបាលកិច្ចដើម្បីពង្រឹងការអនុវត្តច្បាប់ក្នុងវិស័យបរធនបាលកិច្ច និង/ឬ ការត្រួតពិនិត្យលើបរធនបាលកិច្ចដែលបានចុះបញ្ជី, ប្រតិបត្តិការរបស់ប្រតិបត្តិករបរធនបាល និងអ្នកចូលរួមដទៃទៀតក្នុងវិស័យបរធនបាលកិច្ច។

ការធានាគុណភាព

សំដៅដល់សកម្មភាពដែលបានគ្រោងទុកនិងបានរៀបចំជាប្រព័ន្ធគុណភាព ដើម្បីផ្តល់នូវទំនុកចិត្តគ្រប់គ្រាន់ថាផលិតផលឬសេវាកម្មនឹងបំពេញតាមការតម្រូវសម្រាប់គុណភាព។

ការទូទាត់សងប្រាក់ឌីជីថល

គឺជាដំណើរការផ្ទេរមូលនិធិ ឬទូទាត់ថ្លៃទំនិញ/សេវាកម្ម តាមរយៈប្រព័ន្ធអេឡិចត្រូនិក និងបច្ចេកវិទ្យា ដោយមិនចាំបាច់ប្រើសាច់ប្រាក់សុទ្ធ។ ដំណើរការនេះ អនុញ្ញាតឱ្យមានប្រតិបត្តិការហិរញ្ញវត្ថុដែលមានល្បឿនលឿន, សុវត្ថិភាព និងភាពងាយស្រួលដូចជា ការស្កេន QR Code។ ឧទាហរណ៍៖ Bakong, កាបូបលុយអេឡិចត្រូនិក (E-Wallets), កាតធនាគារ និងការទូទាត់តាមទូរស័ព្ទដៃ។

ការទទួលបាន

សំដៅដល់ការទទួលបានទំនិញនិងសិទ្ធិប្រត្យក្សលើអចលនទ្រព្យតាមរយៈអំណោយ ការទិញលក់ ការដោះដូរ ឬតាមការព្រមព្រៀងផ្សេងៗទៀត ព្រមទាំងការទទួលបានសេវាតាមរយៈការព្រមព្រៀងនានា។

ការទទួលកាន់កាប់បន្ត (Takeover)

សំដៅដល់ការសម្រេចបាននូវការទិញមូលបត្រកម្មសិទ្ធិ ការទិញធុរកិច្ច ឬទ្រព្យសកម្មរបស់នីតិបុគ្គលណាមួយ ដើម្បីគ្រប់គ្រង និងកាន់កាប់នីតិបុគ្គលនោះ។

ការត្រួតពិនិត្យផ្ទៃក្នុង

សំដៅដល់គោលនយោបាយ, នីតិវិធី, វិធាន និងការត្រួតពិនិត្យផ្ទៃក្នុងផ្សេងទៀតដែលអនុវត្តដើម្បីធានានូវការគោរពតាមច្បាប់ និងបទប្បញ្ញត្តិដែលមានជាធរមាន។

ការត្រួតពិនិត្យ វាយតម្លៃ, ប្រគល់ទទួល និងបញ្ចប់សុពលភាព

យន្តការត្រួតពិនិត្យការអនុវត្តគម្រោង និងជាការវាយតម្លៃអំពីទំហំការងារ ដោយគណៈកម្មការអន្តរក្រសួងដែលអ្នកទទួលការសម្រេចបាន ដើម្បីជាមូលដ្ឋានទូទាត់/បើកផ្ដល់ តាមលក្ខខណ្ឌនៃកិច្ចសន្យា។

ការតាំងនៅនៃបរធន

បរធនបាលត្រូវមានព័ត៌មានបច្ចុប្បន្នភាពដែលបរធនតាំងនៅ ឬត្រូវបានគ្រប់គ្រង និងរក្សាទុក។

ការតម្រូវពង្រឹងការគ្រប់គ្រងអាជីវកម្ម

សំដៅដល់ការតម្រូវឱ្យក្រុមហ៊ុនបរធនបាលពង្រឹងការគ្រប់គ្រង នៅពេលអនុបាតមូលធនសុទ្ធរបស់ក្រុមហ៊ុនបរធនបាលនោះធ្លាក់ក្រោម ១២០ (មួយរយម្ភៃ) ភាគរយ។

ការចាប់យកវប្បធម៌ឌីជីថល

គឺជាដំណើរការនៃការក្រសោបយក, បញ្ចូល និងប្រើប្រាស់បច្ចេកវិទ្យាឌីជីថលយ៉ាងទូលំទូលាយ នៅក្នុងសកម្មភាពប្រចាំថ្ងៃ អាជីវកម្ម ឬស្ថាប័ន ដើម្បីផ្លាស់ប្តូររបៀបនៃការរស់នៅ, ការងារ និងការទំនាក់ទំនងឱ្យកាន់តែមានប្រសិទ្ធភាព។

ការចាប់យកបច្ចេកវិទ្យាឌីជីថល

គឺជាដំណើរការនៃការប្រើប្រាស់បច្ចេកវិទ្យាឌីជីថល, ឧបករណ៍អេឡិចត្រូនិក ឬកម្មវិធីទំនើបៗឱ្យអស់ពីលទ្ធភាព ដើម្បីផ្លាស់ប្តូររបៀបរស់នៅ, ការងារ និងប្រតិបត្តិការអាជីវកម្មឱ្យមានប្រសិទ្ធភាព និងមិនមែនត្រឹមតែការមានឧបករណ៍នោះទេ ប៉ុន្តែជាការបញ្ចូលឌីជីថលទៅក្នុងសកម្មភាពប្រចាំថ្ងៃដើម្បីកាត់បន្ថយការប៉ានស្មាន និងបង្កើនផលិតភាព។

ការចាប់យកឌីជីថល

សំដៅទៅលើការក្រសោបយកថាមពលនៃបច្ចេកវិទ្យាឌីជីថលមកប្រើប្រាស់ ដើម្បីផ្លាស់ប្តូររបៀបនៃការធ្វើការ ការរស់នៅ និងការតភ្ជាប់ទំនាក់ទំនង និងសំដៅទៅលើដំណើរការនៃការបញ្ចូលបច្ចេកវិទ្យាឌីជីថលទៅក្នុងសកម្មភាពនានារបស់ស្ថាប័ន ក្រុមហ៊ុន ឬបុគ្គលផ្ទាល់ ដោយប្រើប្រាស់យ៉ាងពេញលេញនូវអត្ថប្រយោជន៍នៃបច្ចេកវិទ្យានេះ។ ការចាប់យកឌីជីថលនេះ រួមបញ្ចូលទាំងការប្រើប្រាស់ឧបករណ៍ឬដំណោះស្រាយឌីជីថល និងការធានានូវប្រសិទ្ធភាពនៃការប្រើប្រាស់ដោយភាគីពាក់ព័ន្ធ ដើម្បីសម្រេចឱ្យបាននូវលទ្ធផល និងគោលបំណងដែលចង់បាន។

ការចាប់ផ្ដើមប្រតិបត្តិការបរធនបាលកិច្ច

សំដៅដល់ការចាប់ផ្តើមធ្វើប្រតិបត្តិការរបស់បរធនបាលកិច្ចក្រោយពីទទួលបានអាជ្ញបណ្ណ/ការអនុញ្ញាត/ការចុះបញ្ជីឬចាប់ផ្តើមពេលដែលបរធនបាលចាប់ផ្ដើមជួលបុគ្គលិក ដើម្បីបំពេញការងារសម្រាប់ប្រតិបត្តិការដែលទទួលបានអាជ្ញាបណ្ណ/ការអនុញ្ញាត/ការចុះបញ្ជីឬចាប់ផ្ដើមពីពេលដែលបរធនបាលចាប់ផ្ដើមធ្វើសកម្មភាពពេលដែលទទួលបានអាជ្ញាបណ្ណ និង/ឬការអនុញ្ញាត។

ការចាត់ចែងបណ្តោះអាសន្ន

សំដៅដល់ប្រភេទមួយនៃការចាត់ចែងរក្សាការពារ ដើម្បីធានាសិទ្ឋិលើបំណុល ដែលគ្មានគោលបំណងសងជាប្រាក់។ ការចាត់ចែងជាបណ្តោះអាសន្នមានពីរប្រភេទ គឺការចាត់ចែងជាបណ្ដោះអាសន្នចំពោះវត្ថុ ឬជាកម្មវត្ថុនៃវិវាទ និងការចាត់ចែងជាបណ្តោះអាសន្ន ដែលកំណត់ឋានៈជាបណ្តោះអាសន្ន។

ការគ្រប់គ្រងហិរញ្ញវត្ថុសាធារណៈ

គឺសំណុំនៃច្បាប់, បទដ្ឋាន, ប្រព័ន្ធ និងនីតិវិធីសម្រាប់គ្រប់គ្រងធនធានហិរញ្ញវត្ថុសាធារណៈ ទាំងថ្នាក់ជាតិ និងថ្នាក់ក្រោមជាតិ។ ដំណើរការនៃការគ្រប់គ្រងធនធានហិរញ្ញវត្ថុសាធារណៈ រួមមាន៖ ការរៀបចំគោល-នយោបាយ, ការកៀរគរធនធានហិរញ្ញវត្ថុ, ការវិភាជថវិកា, ការអនុវត្តចំណាយ, ការធ្វើកិច្ចបញ្ជិកា និងការធ្វើសវនកម្ម។ ការគ្រប់គ្រងហិរញ្ញវត្ថុសាធារណៈ ក៏រួមបញ្ចូលក្នុងការគ្រប់គ្រងទ្រព្យសម្បត្តិ, ទ្រព្យទាំងជាទ្រព្យ-ហិរញ្ញវត្ថុ និងទ្រព្យមិនមែនជាហិរញ្ញវត្ថុ។

ការគ្រប់គ្រងហិរញ្ញវត្ថុ

សំដៅដល់វិធីសាស្រ្តនៃការប្រើប្រាស់ធនធានហិរញ្ញវត្ថុរបស់អង្គភាព/ស្ថាប័នប្រកបដោយប្រសិទ្ធភាព និងស័ក្តិសិទិ្ធភាពតាមរយៈការធ្វើផែនការ ការរកប្រភពធនធាន ការបែងចែកធនធាន ការត្រួតពិនិត្យការប្រើប្រាស់ និងការរាយការណ៍ពីធនធានហិរញ្ញវត្ថុរបស់ស្ថាប័ន។

ការគ្រប់គ្រងបច្ចេកវិទ្យាព័ត៌មានទូទៅលម្អិត

ការគ្រប់គ្រងបច្ចេកវិទ្យាព័ត៌មានទូទៅដែលមិនបញ្ចូលក្នុងការគ្រប់គ្រងបច្ចេកវិទ្យាព័ត៌មានទូទៅរួមទេ និងផ្តោតជាចម្បងលើការទទួលបានការថែរក្សា និងប្រតិបត្តិការនៃហេដ្ឋារចនាសម្ព័ន្ធបច្ចេកវិទ្យាព័ត៌មាន និងសេវាកម្មដែលគាំទ្រដល់ដំណើរការនៃកម្មវិធីស្រាប់។

ការគ្រប់គ្រងបច្ចេកវិទ្យាព័ត៌មានទូទៅរួម

ការគ្រប់គ្រងបច្ចេកវិទ្យាព័ត៌មានទូទៅ ដែលត្រូវបានតាក់តែងឡើងដើម្បីគ្រប់គ្រង និងពិនិត្យតាមដានលើបរិស្ថានបច្ចេកវិទ្យាព័ត៌មាន ហើយមានឥទ្ធិពលលើកម្មវិធីស្រាប់ទាំងអស់។ កិច្ចការនេះផ្តោតសំខាន់លើការគ្រប់គ្រង និងពិនិត្យតាមដានលើបច្ចេកវិទ្យាព័ត៌មាន។

ការគេចវេះពន្ធ

បទល្មើសដោយចេតនា ដោយដឹងជាមុន មានការរៀបចំទុកនិងច្រើនដងទៅលើបទប្បញ្ញត្តិស្ដីពីពន្ធដារក្នុងបំណងបន្ថយ ឬបំបាត់ប្រាក់ពន្ធដែលបទប្បញ្ញត្តិស្ដីពីពន្ធដារតម្រូវឱ្យបង់។

ការគំរាមកំហែងសន្តិសុខឌីជីថល

គឺជាសកម្មភាពព្យាបាទ សំដៅលើគ្រោះថ្នាក់ ឬហានិភ័យតាមអនឡាញ ដែលបម្រុងទុកដើម្បីជ្រៀតចូល, លួចកែប្រែ, បំផ្លាញ ឬបង្អាក់ដំណើរការនៃព័ត៌មាន, ទិន្នន័យផ្ទាល់ខ្លួន និងឧបករណ៍ឌីជីថល (កុំព្យូទ័រ/ទូរស័ព្ទ) ក្នុងគោលបំណងចម្បងគឺដើម្បីកេងចំណេញផ្នែកហិរញ្ញវត្ថុ បង្កភាពវឹកវរ ឬលួចយកព័ត៌មានសម្ងាត់។

ការក្លែងបន្លំអត្តសញ្ញាណ

គឺជាសកម្មភាពទុច្ចរិត ដែលជនខិលខូចលួចយកព័ត៌មានផ្ទាល់ខ្លួន ឬក្លែងបន្លំខ្លួនជាបុគ្គលដទៃ (សាច់ញាតិ, មិត្តភក្តិ ឬអាជ្ញាធរ) ដើម្បីបោកបញ្ឆោតលួចយកលុយកាក់ ឬទិន្នន័យសំខាន់ៗ ឬប្រព្រឹត្តបទល្មើសផ្សេងៗ។ ជនល្មើសច្រើនប្រើល្បិចបច្ចេកវិទ្យា (Cyber) ឬការវិស្វកម្មសង្គម ដើម្បីទទួលបានទំនុកចិត្តពីជនរងគ្រោះ។

ការក្លែងបន្លំ

គឺជាអំពើបោកប្រាស់ដោយចេតនា ដើម្បីបំភាន់ភ្នែកអ្នកដទៃឱ្យយល់ខុសពីការពិត ក្នុងគោលបំណង កេងចំណេញផលប្រយោជន៍ណាមួយ ឬបង្កការខូចខាតដល់ជនរងគ្រោះ។

ការកែទម្រង់ស្ថាប័ន ឫកំណែទម្រង់ស្ថាប័ន

សំដៅទៅលើការផ្លាស់ប្តូររចនាសម្ព័ន្ធប្រព័ន្ធនីតិវិធី និងរបៀបរបបធ្វើការងាររួមទាំងខ្សែគណនេយ្យភាព ទំនាក់ទំនង និងដំណើរការនៃការធ្វើសេចក្តីសម្រេចរបស់រដ្ឋបាលថ្នាក់ក្រោមជាតិ។

ការការពារអ្នកប្រើប្រាស់

គឺជាក្របខ័ណ្ឌច្បាប់ និងសកម្មភាពនានាដែលបង្កើតឡើងដើម្បីធានាសុវត្ថិភាព, សិទ្ធិ និងផលប្រយោជន៍របស់អ្នកប្រើប្រាស់ទំនិញ ឬសេវាកម្ម ក្នុងគោលបំណងការពារប្រឆាំងនឹងការអនុវត្តធុរកិច្ចមិនស្មោះត្រង់, ការផ្សាយពាណិជ្ជកម្មបំភាន់ និងការលក់ផលិតផលដែលមិនមានគុណភាព ឬបង្កគ្រោះថ្នាក់។

ការការពារទិន្នន័យឯកជន

គឺជាការធានាសិទ្ធិរបស់បុគ្គលក្នុងការគ្រប់គ្រងព័ត៌មានផ្ទាល់ខ្លួន ដោយផ្តោតលើការប្រមូល, ការប្រើប្រាស់, ការចែករំលែក និងការរក្សាទុកទិន្នន័យឱ្យស្របច្បាប់, តម្លាភាព និងមានក្រមសីលធម៌ ក្នុងគោលបំណងការពារព័ត៌មានមិនឱ្យបែកធ្លាយ, លួច ឬប្រើប្រាស់ខុសគោលដៅ។

ការការពារទិន្នន័យបុគ្គល

គឺជាគោលការណ៍, សិទ្ធិ និងវិធានការច្បាប់ដែលប្រើដើម្បីគ្រប់គ្រង ការពារឯកជនភាព និងសុវត្ថិភាពព័ត៌មានផ្ទាល់ខ្លួនរបស់បុគ្គល និងធានាថាការប្រមូល, ប្រើប្រាស់, រក្សាទុក និងចែកចាយទិន្នន័យ (ដូចជា ឈ្មោះ, លេខទូរស័ព្ទ, អ៊ីមែល និងព័ត៌មានហិរញ្ញវត្ថុ) ត្រូវធ្វើឡើងដោយមានតម្លាភាព ស្របច្បាប់ និងមានការអនុញ្ញាតពីម្ចាស់។

កសាងសមត្ថភាព

ការអភិវឌ្ឍចំណេះដឹង ជំនាញ សមត្ថភាពរបស់បុគ្គលិក ឬស្ថាប័នដើម្បីបំពេញកិច្ចការដោយមានប្រសិទ្ធភាព។ ការកសាងសមត្ថភាពអាចធ្វើឡើងតាមរយៈការអប់រំ វគ្គបណ្ដុះបណ្ដាល (Training Courses) ជាផ្លូវការ ឬតាមរយៈការរៀនបណ្ដើរ ធ្វើបណ្ដើរ (On-job-training)។

កលិយុគ

(សេដ្ឋកិច្ច) ភាពចលាចល ឬភាពរំជើបរំជួលនៃស្ថានភាពសេដ្ឋកិច្ចនិងហិរញ្ញវត្ថុ។

ករណីយកិច្ច

កិច្ចការ ដែលត្រូវតែធ្វើតាមវិធានច្បាប់ដែលបានចែង។

កម្រៃសួយសារ

ជាកម្រៃដែលទូទាត់ដោយភាគីមួយជូនភាគីមួយទៀតដែលជាម្ចាស់នៃទ្រព្យសម្បតិ្ត ណាមួយ ដើម្បីមានសិទ្ធិក្នុងការប្រើប្រាស់ទ្រព្យសម្បត្តិនោះ។

កម្រៃសម្បទាន

ជាកម្រៃទូទាត់ដោយក្រុមហ៊ុនដែលជាថ្នូនឹងការអនុញ្ញាតឱ្យប្រតិបត្តិការសេវាកម្មគម្រោងស្របតាមសេចក្តីណែនាំ នៃកិច្ចព្រមព្រៀង។ ការទូទាត់នេះ អាចជាទំហំថេរ ឬជាសមាមាត្រនៃចំណូលដុល ឬអាចជាទាំងពីរទម្រង់។

កម្រៃ

ផលជាប្រាក់បានមកអំពីកិច្ចការការិយាល័យ ឋានៈ មុខងារ ឬការងារ ដែលរួមទាំងប្រាក់បៀវត្ស ប្រាក់ឈ្នួល និងប្រាក់បន្ថែមឯទៀត។

កម្មសិទ្ធិអវិភាគ

កម្មសិទ្ធិរបស់បុគ្គលច្រើននាក់ ដែលអនុវត្តសិទ្ធិរបស់ខ្លួនដោយសាមគ្គីគ្នាទៅលើទ្រព្យទាំងមូល គឺកម្មសិទ្ធិអវិភាគ។

កម្មសិទ្ធិករលើវត្ថុ

បរធនបាលត្រូវមានព័ត៌មាននៃកម្មសិទ្ធិករទាំងអស់នៃវត្ថុដែលជាបរធន តាមរយៈលិខិតគតិយុត្ត ឬឯកសារដែលបញ្ជាក់ពីភាពជាកម្មសិទ្ធិករលើចលនវត្ថុ ឬអចលនវត្ថុ តាមរយៈលិខិតគតិយុត្ត អំពីការផ្ទេរកម្មសិទ្ធិ, បណ្ណសម្គាល់ម្ចាស់អចលនវត្ថុ, ឬលិខិតតុបករណ៍ ឬលិខិតយុត្តិការផ្សេងទៀតដែលអាចបញ្ជាក់ភាពជាម្ចាស់កម្មសិទ្ធិលើវត្ថុស្របច្បាប់ជាធរមាន។

កម្មសិទ្ធិករ

សំដៅដល់៖ ១. ម្ចាស់កម្មសិទ្ធិលើទ្រព្យ និងមានសិទ្ធិប្រើប្រាស់ សិទ្ធិអាស្រ័យផល និងសិទ្ធិចាត់ចែងលើទ្រព្យដែលជារបស់ខ្លួន។ ២. រូបវន្តបុគ្គល ឬនីតិបុគ្គល ដែលមានបណ្ណសម្គាល់សិទ្ធិ ឬបណ្ណសម្គាល់សិទ្ធិកាន់កាប់អចលនវត្ថុ ឬវិញ្ញាបនបត្រសម្គាល់ម្ចាស់អចលនវត្ថុ ដែលចេញដោយរដ្ឋបាលសុរិយោដី។

កម្មសិទ្ធបញ្ញា

សំដៅទៅលើការបង្កើតដោយគំនិតបញ្ញា ដូចជា តក្កកម្ម ស្នាដៃអក្សរសាស្រ្តនិងសិល្បៈ និមិត្តសញ្ញា រូបភាព និងគំរូដែលត្រូវបានប្រើប្រាស់នៅក្នុងពាណិជ្ជកម្ម។

កម្មសិទ្ធករ

ម្ចាស់កម្មសិទ្ធិ, អ្នកដែលមានសិទ្ធិប្រើប្រាស់សិទ្ធិអាស្រ័យផលនិងសិទ្ធិចាត់ចែងលើវត្ថុណាមួយ។

កម្មវិធីសេវាឌីជីថល

គឺជាការប្រើប្រាស់បច្ចេកវិទ្យា (កម្មវិធីទូរស័ព្ទ ឬវេបសាយ) ដើម្បីផ្តល់សេវាកម្ម រដ្ឋបាល សាធារណៈ ឬឯកជនឱ្យកាន់តែរហ័ស, តម្លាភាព និងងាយស្រួលដូចជា ការប្រើសេវាសាធារណៈឌីជីថលផ្សេងៗ។

កំណត់ហេតុ

សំដៅដល់កំណត់ហេតុដែលត្រូវបំពេញដោយមន្រ្តីអធិការកិច្ចតាមគំរូដែលបានកំណត់។