សទា្ទនុក្រមបរធនបាលកិច្ច

ឯកសិទ្ធិ

សំដៅដល់សិទ្ធិដែលទទួលបាននូវការសងពីទ្រព្យដែលជាកម្មវត្ថុនៃឯកសិទ្ធិដោយមានអាទិភាពជាងម្ចាស់បំណុលផ្សេងទៀត។

ឯកសារចម្លងយថាភូត

សំដៅដល់ឯកសារចម្លងមួយប្រភេទដែលចម្លងចេញពីឯកសារយថាភូត ដែលជាបុគ្គលដែលមានអំណាចតាមបញ្ញត្តិច្បាប់ដើមដែលត្រូវធ្វើឡើង នៃច្បាប់បទដ្ឋានគតិយុត្ត។

ឯកជនភាពនៃទិន្នន័យផ្ទាល់ខ្លួន

នីតិវិធីដែលធានាថាទិន្នន័យរបស់រូបវន្តបុគ្គល និងនីតិបុគ្គលដែលទទួលបានការយល់ព្រមឱ្យកត់ត្រាដោយនីតិបុគ្គលណាមួយក្នុងប្រព័ន្ធបច្ចេកវិទ្យាមិនត្រូវបានចែករំលែក លួចយក ឬយកទៅប្រើប្រាស់ដោយគ្មានការអនុញ្ញាតពីម្ចាស់ទិន្នន័យ។

ឧស្សាហកម្ម ៤.០

បរិបទនៃការវិវឌ្ឍឧស្សាហកម្មដែលបច្ចេកវិទ្យាអនុញ្ញាតឱ្យមាន ការបញ្ចូលគ្នានៃទិន្នន័យពីម៉ាស៊ីន ឧបករណ៍ និងសេនស័រពីខ្សែច្រវាក់ផលិតកម្ម និងពីការប្រើប្រាស់របស់មនុស្ស ហើយដែលផ្តល់ព័ត៌មានច្បាស់លាស់ និងទាន់ពេលដល់អ្នកផលិត និងអ្នកពាក់ព័ន្ធសំដៅធ្វើឱ្យប្រសើរឡើងនូវខ្សែច្រវាក់ផលិតកម្មទាំងមូល។

ឧបត្ថម្ភធន

គឺជាការគាំទ្រផ្នែកហិរញ្ញវត្ថុ ឬអត្ថប្រយោជន៍ផ្សេងៗ (ដូចជាការកាត់បន្ថយពន្ធ) ដែលរដ្ឋាភិបាលផ្តល់ឱ្យស្ថាប័ន, ក្រុម ឬបុគ្គល ដើម្បីលើកកម្ពស់សេដ្ឋកិច្ច សុខុមាលភាពសង្គម ឬផលប្រយោជន៍សាធារណៈ។

ឧបករណ៍ប្រមូលទិន្នន័យ

គឺជាវិធីសាស្រ្តដែលប្រើប្រាស់ដើម្បីកំណត់នូវប្រភពព័ត៌មាន និងប្រមូលទិន្នន័យក្នុងកំឡុងពេលអនុវត្តការ-វាយតម្លៃ។ ឧទាហរណ៍៖ ការសម្ភាសន៍, ការស្ទង់មតិ និងការអង្កេត។ល។

ឧត្តមានុវត្តន៍

គោលការណ៍ ឬស្តង់ដារ និងការអនុវត្តតាមអនុសាសន៍របស់អង្គភាពជំនាញវិជ្ជាជីវៈ និងស្ថាប័នអភិបាលកិច្ចផ្ទៃក្នុង។ ច្បាប់ បទប្បញ្ញត្តិផ្សេងៗ និងស្តង់ដារទូទៅផ្សេងៗទៀត ដែលដកស្រង់ពីទស្សនៈល្អៗរបស់ស្ថាប័នអាជីពដែលត្រូវបានទទួលស្គាល់ថាបានអនុវត្តល្អបំផុត សម្រាប់ការត្រួតពិនិត្យកិច្ចលទ្ធកម្មតាមក្រោយ។

ឧក្រិដ្ឋកម្មសាយប័រ

បទល្មើសដែលប្រព្រឹត្តនៅក្នុងបណ្តាញបច្ចេកវិទ្យាគមនាគមន៍ និងព័ត៌មានដូចជា ការចូលលួច ក្លែងបន្លំ ឬកែឯកសារ ការបញ្ចូលមេរោគ ការផ្ញើសារគំរាមកំហែង ឬចាប់ជំរិត ឬការធ្វើឱ្យប៉ះពាល់សន្តិសុខសេដ្ឋកិច្ច និងសង្គមជាតិ។

ឥណទេយ្យមិនមែនពាណិជ្ជកម្ម

សំដៅដល់សាច់ប្រាក់ដទៃទៀតដែលសមភាគីជំពាក់ក្រុមហ៊ុនបរធនបាលក្រៅពីឥណទេយ្យពាណិជ្ជកម្ម។

ឥណទេយ្យពាណិជ្ជកម្ម

សំដៅដល់លាភការដែលអតិថិជនជំពាក់សម្រាប់ប្រតិបត្តិការបរធនបាលកិច្ចរបស់អតិថិជនដែលរួមទាំងកម្រៃជើងសា ឬថ្លៃសេវាផ្សេងៗ។

ឥណទាយិក

សំដៅដល់សហគ្រាសសាធារណៈ, គ្រឹះស្ថានសាធារណៈរដ្ឋបាល, នីតិបុគ្គលសាធារណៈដទៃទៀត ឬគ្រឹះស្ថានធនាគារនិងហិរញ្ញវត្ថុ ដែលទទួលបានឥណទានពីរដ្ឋ។

ឥណទាយក

សំដៅដល់ដៃគូអភិវឌ្ឍន៍ទ្វេភាគី និងពហុភាគីដែលផ្តល់ឥណទានឱ្យរដ្ឋខ្ចី ដូចជា៖ ប្រទេសចិន, ប្រទេសជប៉ុន, សាធារណៈរដ្ឋកូរ៉េ, ប្រទេសបារាំង, ធនាគារអភិវឌ្ឍន៍អាស៊ី និងធនាគារពិភពលោក ជាដើម។

អ្នកវិនិយោគ

មានន័យថា បុគ្គលណាមួយដែលអនុវត្តគម្រោងវិនិយោគមានលក្ខណៈសម្បត្តិគ្រប់គ្រាន់។

អ្នកផ្ដល់វិភាគទានបរធនបាលកិច្ច

សំដៅដល់បុគ្គលណាដែលផ្ដល់វិភាគទានទៅក្នុងបរធនបាលកិច្ច ឬបរធនបាលកិច្ចដែលមានស្រាប់ និងមានសិទ្ធិចូលរួមកំណត់លក្ខខណ្ឌនៃការបង់វិភាគទានដែលនឹងត្រូវគ្រប់គ្រងនិងចាត់ចែងដោយបរធនបាល និងលក្ខខណ្ឌនៃការទទួលផលរបស់អត្ថគាហកៈ។

អ្នកប្រើប្រាស់

សំដៅដល់ បុគ្គលដែលទទួលបានទំនិញឬសេវា៖ ក. ដែលជាធម្មតាយកទៅប្រើប្រាស់ជាលក្ខណៈផ្ទាល់ខ្លួនក្នុងផ្ទះ ឬក្នុងគ្រួសារ និង ខ. ក្នុងគោលបំណង៖ - មិនផ្គត់ផ្គង់បន្តក្នុងការធ្វើពាណិជ្ជកិច្ច ឬ - មិនប្រើប្រាស់ក្នុងដំណើរការចង្វាក់ផលិតកម្មឬការផលិត ឬមិនប្រើប្រាស់ទំនិញក្នុងសកម្មភាពពាណិជ្ជកម្មដូចជា ដើម្បីជួសជុលអគារឬយកទៅធ្វើជាវត្ថុតាំងភ្ជាប់លើអចលនទ្រព្យ។

អ្នកតំណាងពេញសិទ្ធិ

តំណាងដែលមានអនុភាពតាមផ្លូវច្បាប់ ក្នុងការចុះហត្ថលេខាលើកិច្ចសន្យាឬធ្វើការសម្រេចចិត្តក្នុងនាមភាគីដែលខ្លួនតំណាង។

អ្នកតំណាងដែលច្បាប់បានកំណត់

សំដៅដល់បុគ្គល ដែលទទួលសិទ្ធិតំណាងកំណត់ដោយច្បាប់ដូចជា អ្នកមាន, អំណាចមេបា ឬអ្នកអាណា-ព្យាបាលជាដើម។ ឧ. អ្នកមានអំណាចមេបា អាចតំណាងឱ្យកូន ដែលជាអនីតិជនចំពោះ សកម្មភាពបណ្ដឹង។

អ្នកតំណាង

សំដៅដល់បុគ្គលមានលក្ខណសម្បត្តិ ឬឋានៈតាមផ្លូវច្បាប់ ដែលបានទទួលសិទ្ឋិតំណាង (ម.ព. សិទ្ឋិតំណាង)។

អ្នកជំនាញវាយតម្លៃ

សំដៅដល់រូបវន្តបុគ្គលដែលទទួលបានវិញ្ញាបនបត្រវិជ្ជាជីវៈពីនិយ័តករអាជីវកម្មអចលនវត្ថុនិងបញ្ចាំ (ន.អ.ប.) ដើម្បីផ្តល់សេវាកម្មវាយតម្លៃជូនអតិថិជន ក្នុងនាមក្រុមហ៊ុនវាយតម្លៃ និងទទួលបានការទទួលស្គាល់គុណវុឌ្ឍិពីនិយ័តករបរធនបាលកិច្ច (ន.ប.ធ.)។

អ្នកជំនាញភ្នាក់ងារអចលនវត្ថុ

រូបវន្តបុគ្គលដែលទទួលបានវិញ្ញាបនបត្រវិជ្ជាជីវៈពីក្រសួង ដើម្បីផ្តល់សេវាកម្មភ្នាក់ងារអចលនវត្ថុជូនអតិថិជន ក្នុងនាមក្រុមហ៊ុនភ្នាក់ងារអចលនវត្ថុ។

អ្នកកាន់កាប់

រូបវន្តបុគ្គល ឬនីតិបុគ្គល ដែលគ្មានបណ្ណសម្គាល់សិទ្ធិ ឬបណ្ណសម្គាល់សិទ្ធិកាន់កាប់អចលនវត្ថុ ឬវិញ្ញាបនបត្រសម្គាល់ម្ចាស់អចលនវត្ថុ ដែលចេញដោយរដ្ឋបាលសុរិយោដី។

អាវុធមហាប្រល័យ

សំដៅដល់អាវុធផ្ទុះអាតូមិកឬនុយក្លេអ៊ែរ អាវុធសម្ភារៈវិទ្យុសកម្ម អាវុធគីមី និងអាវុធជីវសាស្រ្តដែលអាចសម្លាប់ ឬបង្កមហន្តរាយដល់មនុស្សឬសត្វពាហនៈ ព្រមទាំងអាវុធផ្សេងទៀត ដែលនឹងត្រូវបានផលិតនាពេលអនាគតដែលមានលក្ខណៈបង្កនូវផលបំផ្លិចបំផ្លាញដូចនឹងគ្រាប់បែកអាតូមិកឬនុយក្លេអ៊ែរ ឬអាវុធដទៃទៀតដូចដែលបានរៀបរាប់ខាងលើ។

អានុភាពប្រតិសកម្ម

សំដៅដល់៖ ១- សកម្មភាពស្របតាមលក្ខខណ្ឌគតិយុត្ត ដែលមានឥទ្ធិពលទៅលើសកម្មភាពពីអតីតភាព ២- ឥទ្ធិពល នៃលក្ខខណ្ឌគតិយុត្ត ដែលមានទៅលើសកម្មភាពពីអតីតកាល។

អាជ្ញាបណ្ណ

លិខិតអនុញ្ញាតដែលបានចេញឱ្យតាមការស្នើសុំ ដើម្បីប្រើស្តង់ដារឧស្សាហកម្ម ឬសញ្ញាសម្គាល់។

អស្សាមិករណ៍

សំដៅដល់ការដកហូតកម្មសិទ្ធិលើអចលនវត្ថុ ឬលើសិទ្ធិប្រត្សក្សលើអចលនវត្ថុរបស់រូបវន្តបុគ្គល នីតិបុគ្គលឯកជន និងនីតិបុគ្គលសាធារណៈដែលបម្រើប្រយោជន៍សាធារណៈ និងផលប្រយោជន៍ជាតិ ព្រមទាំងផ្តល់នូវសំណងជាមុនសមរម្យ និងយុត្តិធម៌។

អភិបាលកិច្ចសាជីវកម្ម

សំដៅដល់យន្ដការក្នុងការធានានូវទំនាក់ទំនងក្នុងចំណោមបុគ្គលសំខាន់ៗដូចជា ក្រុមប្រឹក្សាភិបាល, ម្ចាស់ភាគហ៊ុន, គណៈគ្រប់គ្រងក្រុមហ៊ុន និងភាគីពាក់ព័ន្ធ។

អភិបាលកិច្ចដោយផ្អែកលើទិន្នន័យ

អភិបាលកិច្ចដោយប្រើប្រាស់ទិន្នន័យដើម្បីនាំឱ្យមានការសម្រេចចិត្តជាគោលនយោបាយ ផ្លាស់ប្តូរវិធានការគោលនយោបាយ និងតាមដានការអនុវត្តគោលនយោបាយក្នុងន័យបង្កើនតម្លាភាព។

អភិបាល

សមាជិកនៃក្រុមប្រឹក្សាភិបាលរបស់ក្រុមហ៊ុន។

អំពើអនីត្យានុកូល

សំដៅដល់អំពើ ដែលបំពានដោយខុសច្បាប់លើសិទ្ធិ ឬផលប្រយោជន៍អ្នកដទៃដោយកំហុសចេតនា ឬអចេតនា។

អំពើមិនសុចរិត

សំដៅដល់អំពើណាមួយរបស់បុគ្គលលនៅក្នុងធុរកិច្ចដែលអាចបំភាន់ឬបោកបញ្ជោតអ្នកប្រើប្រាស់ ទោះបីជាអំពើនោះធ្វើដោយចេតនាឬអចេតនាក៏ដោយ។

អន្តរប្រតិបត្តិការ (ទៅវិញទៅមក)

សមត្ថភាពនៃប្រព័ន្ធបច្ចេកវិទ្យាព័ត៌មានដែលអាចធ្វើសន្ធានកម្ម ជាមួយគ្នាក្នុងការផ្លាស់ប្តូរ និងការប្រើប្រាស់ទិន្នន័យ ដែលជាទូទៅកើតឡើងដោយស្វ័យប្រវត្តិក្រោមលក្ខខណ្ឌច្បាស់លាស់។

អន្តរការិយកម្មហិរញ្ញវត្ថុ

គឺជាដំណើរការនៃការផ្ទេរមូលនិធិពីអ្នកមានប្រាក់សន្សំ (អង្គភាពអតិរេក) ទៅកាន់អ្នកត្រូវការប្រាក់កម្ចី (អង្គភាពឱនភាព) ដោយមានស្ថាប័នកណ្តាលដូចជាធនាគារ ឬគ្រឹះស្ថានហិរញ្ញវត្ថុដើរតួជាអន្តរការី។

អនុស្សរណៈនៃការយោគយល់

សំដៅលើឯកសារដែលពិពណ៌នាពីចំណុចទូទៅនៃកិច្ចព្រមព្រៀងទ្វេភាគី ឬពហុភាគី ដែលភាគីទាំងអស់បានឯកភាពគ្នា។

អនុសាសន៍ពង្រឹងការគ្រប់គ្រង អាជីវកម្ម

សំដៅដល់ការផ្តល់អនុសាសន៍ដល់ក្រុមហ៊ុនបរធនបាល ឱ្យពង្រឹងការគ្រប់គ្រងនៅពេល អនុបាតមូលធនសុទ្ធរបស់ក្រុមហ៊ុននោះ ធ្លាក់ក្រោម ១៥០ (មួយរយហាសិប) ភាគរយ។

អនុលោមភាព

សំដៅដល់ការធ្វើសកម្មភាព ឬការប្រតិបត្តិឱ្យស្របទៅតាមច្បាប់, បទបញ្ជា, គោលការណ៍ណែនាំ ឬស្តង់ដាដែលត្រូវបានកំណត់ដោយស្ថាប័នមានសមត្ថកិច្ច ឬអង្គភាពខ្លួនឯង។

អនុលក្ខណៈនិច្ឆ័យ

សមាសធាតុនីមួយៗនៃលក្ខណៈវិនិច្ឆ័យទាំងមូល ដែលត្រូវបានប្រើប្រាស់ដើម្បីវាយតម្លៃសំណើដែលបានដាក់។

អនុបាតមូលធនសុទ្ធ

សំដៅដល់ផលធៀបជាភាគរយរវាងមូលធនប្រតិបត្តិការសុទ្ធ និងហានិភ័យដុល។

អនុបំណុល

សំដៅដល់មូលនិធិហិរញ្ញប្បទាន ឬហិរញ្ញប្បទានឥតសំណងរបស់ដៃគូអភិវឌ្ឍ ដែលកំពុងត្រូវបានប្រើប្រាស់ដោយនីតិបុគ្គលណាមួយ ក្នុងគោលបំណងបន្តសកម្មភាពអភិវឌ្ឍន៍វិស័យធនាគារ និងមីក្រូហិរញ្ញវត្ថុក្រោមកិច្ចព្រមព្រៀងអនុបំណុល។

អធិកលាភ

សំដៅដល់តម្លៃលើសនៃទ្រព្យណាមួយពីតម្លៃមុន។

អត្ថគាហកៈ

សំដៅដល់បុគ្គលដែលទទួលផលប្រយោជន៍ពីបរធនបាលកិច្ច។

អត្តសញ្ញាណឌីជីថល

ព័ត៌មានដែលបញ្ជាក់ពីអត្តសញ្ញាណរូបវន្តបុគ្គល និងនីតិបុគ្គលក្នុងពិភពឌីជីថលដែលព័ត៌មាននេះបានភ្ជាប់ទៅនឹងអត្តសញ្ញាណរូបវន្តបុគ្គល និងនីតិបុគ្គលនៅក្នុងពិភពពិត។

អតិថិជនជាវិនិយោគិនស្ថាប័ន

សំដៅដល់នីតិបុគ្គលដែលមានសមត្ថភាព វិជ្ជាជីវៈពាក់ព័ន្ធនឹងហានិភ័យ នៃការវិនិយោគ ហើយហ៊ាន ធ្វើការវិនិយោគក្នុងទំហំទឹកប្រាក់កម្រិតខ្ពស់ ដើម្បីទទួលបានប្រាក់ចំណេញច្រើន។

អតិថិជនជាវិនិយោគិនគុណវុឌ្ឍិ

គឺជាអតិថិជនដែលមានស្ថានភាពហិរញ្ញវត្ថុរឹងមាំ ឬមានប្រាក់ចំណូល និងទ្រព្យសម្បត្តិលើសពីកម្រិតកំណត់ និងមានចំណេះដឹង ឬបទពិសោធន៍ក្នុងការវិនិយោគ ដែលអាចយល់ដឹង និងវាយតម្លៃអំពីហានិភ័យនៃផលិតផលវិនិយោគផ្សេងៗ និងអាចទទួលយកហានិភ័យក្នុងកម្រិតខ្ពស់។

អំណោយ

សំដៅដល់ការផ្ទេរទ្រព្យសម្បត្តិដោយស្ម័គ្រចិត្តពីបុគ្គលម្នាក់ទៅបុគ្គលម្នាក់ទៀតដោយគ្មានតម្លៃតបស្នងឬកាតព្វកិច្ចត្រឡប់។

អច្ច័យទានមានកំណត់

សំដៅដល់ប្រទានកម្មដែលកំណត់ទ្រព្យសម្បត្តិជាក់លាក់ទៅឱ្យមនុស្សម្នាក់ ឬច្រើននាក់ តាមរយៈមតកសាសន៍។

អចលកម្មហិរញ្ញវត្ថុ

សំដៅដល់ការវិនិយោគលើមូលបត្រ ឬមូលបត្រដែលបានមកពីការចូលរួមទុនជាមួយសហគ្រាស ឬក្រុមហ៊ុន។ អចលកម្មហិរញ្ញវត្ថុនេះ ជាទ្រព្យសកម្មហិរញ្ញវត្ថុថេរមិនចរន្ត។ ទ្រព្យសកម្មហិរញ្ញវត្ថុ ដែលជាអចលកម្មហិរញ្ញវត្ថុរួមមាន មូលបត្រគ្រប់ប្រភេទទាំងអស់, វិញ្ញាបនបត្រផ្ញើប្រាក់, បណ្ណសន្យារ៉ាប់រង, ផលបត្រពាណិជ្ជកម្ម, បណ្ណសងតាមបញ្ជា, រូបីយណត្តិ និងមូលប្បទានបត្រ ជាដើម។

អង្គភាពគ្រប់គ្រងគម្រោង

អង្គភាពដែលបានបង្កើតឡើងនៅគ្រប់ស្ថាប័នសាមីនីមួយៗ ដើម្បីអនុវត្តគម្រោង។ អង្គភាពនេះអាចត្រូវបានបង្កើតឡើងសម្រាប់អនុវត្តគម្រោងជាក់លាក់ណាមួយ ឬអាចជាអង្គភាពសម្រាប់អនុវត្តគម្រោងទាំងអស់របស់ស្ថាប័នសាមីដែលតែម្តង។

អង្គភាព

សំដៅដល់នីតិបុគ្គល អង្គភាពមិនមែនសាជីវកម្ម ក្រុម សមាគម អង្គការ គ្រឹះស្ថាននិងការចងក្រងនានា។

អក្ខរកម្មហិរញ្ញវត្ថុ

សមត្ថភាពក្នុងការយល់ និងការប្រើប្រាស់ជំនាញហិរញវត្ថុផ្សេងៗ រួមមានដូចជា ការគ្រប់គ្រងហិរញ្ញវត្ថុផ្ទាល់ខ្លួន និងការវិនិយោគប្រកបដោយប្រសិទ្ធភាព។

អក្ខកម្មឌីជីថល

ជំនាញដែលជំរុញសមត្ថភាពឌីជីថល និងការប្រើប្រាស់បច្ចេកវិទ្យាព័ត៌មាន និងទូរគមនាគមន៍ សម្រាប់ការសិក្សារៀនសូត្រ កម្សាន្ត ការងារ និងការប្រាស្រ័យទាក់ទង។

ហ៊ីប៉ូតែក

សំដៅដល់សិទ្ធិប្រាតិភោគប្រត្យក្សមួយប្រភេទ។ ហ៊ីប៉ូតែក ផ្ដល់ឱ្យម្ចាស់បំណុលនូវសិទ្ធិទទួលការសង ចំពោះសិទ្ធិលើបំណុលរបស់ខ្លួនដោយមានអាទិភាពជាងម្ចាស់បំណុលផ្សេងទៀត ចំពោះអចលនវត្ថុដែលបានដាក់ជាប្រាតិភោគកាតព្វកិច្ចដោយកូនបំណុល ឬតតិយជនដោយមិនផ្ទេរការកាន់កាប់។

ហិរញ្ញប្បទានឥតសំណងរបស់ដៃគូអភិវឌ្ឍ

សំដៅដល់មូលនិធិជំនួយឥតសំណងដំបូងដែលត្រូវបានផ្ដល់ដោយដៃគូអភិវឌ្ឍឱ្យទៅបុគ្គលណាមួយនៅក្នុងព្រះរាជាណាចក្រកម្ពុជាសម្រាប់គោលបំណងនៃបរធនបាលកិច្ច។

ហិរញ្ញប្បទានឥតសំណង

គឺជាការផ្តល់ឱ្យជាសាច់ប្រាក់, ទំនិញ ឬសេវាដោយមិនតម្រូវឱ្យទូទាត់សងវិញ។

ហិរញ្ញប្បទានភេរវកម្ម

សំដៅដល់ការផ្តល់ឬការប្រមូលដោយចេតនានូវទ្រព្យសម្បត្តិ មូលនិធិឬសេវាផ្សេងៗក្នុងបំណងប្រើប្រាស់ ឬដោយដឹងថាទ្រព្យសម្បត្តិ មូលនិធិ ឬសេវានេះនឹងត្រូវបានឬអាចប្រើប្រាស់ទាំងមូល ឬមួយផ្នែកសម្រាប់គាំទ្ររាល់សកម្មភាព ជាអាទិ៍ ការធ្វើដំណើរការបណ្តុះបណ្តាល ការរៀបចំ ការចូលរួម ឬការប្រព្រឹត្តអំពើភេរវកម្ម របស់ភេរវករឬអង្គការចាត់តាំងរបស់ភេរវកម្ម។

ហិតូបត្ថម្ភកៈ

ជនដែលច្បាប់ចាត់ឱ្យឃុំគ្រងទ្រព្យរបស់អនីតិជន ឬទ្រព្យរបស់ជនល្ងីល្ងើជាដើម។

ហានិភ័យឥណទាន

សំដៅដល់ហានិភ័យដែលជះឥទ្ធិពលលើក្រុមហ៊ុនបរធនបាល ដែលបង្កឡើងដោយសារការរំលោភកិច្ចសន្យាទូទាត់សងប្រាក់កម្ចីរបស់សមភាគី។

ហានិភ័យហិរញ្ញវត្ថុ

គឺជាលទ្ធផលហិរញ្ញវត្ថុនៃការអនុវត្តជាក់ស្តែង អាចខុសគ្នាច្រើនពីការគ្រោងទុកដោយសារការប្រែប្រួលអវិជ្ជមាននៃស្ថានភាពម៉ាក្រូសេដ្ឋកិច្ច និងបំណុលមិនបានគ្រោងទុក។

ហានិភ័យប្រតិបត្តិការ

សំដៅដល់ឱកាសខាតបង់ដែលជះឥទ្ធិពលលើក្រុមហ៊ុនបរធនបាល បង្កឡើងដោយកំហុសឆ្គងដំណើរការផ្ទៃក្នុង ការគ្រប់គ្រងធនធានមនុស្ស និងប្រព័ន្ធមិនល្អ ឬ ព្រឹត្តិការណ៍ ឬបុព្វហេតុខាងក្រៅ។

ហានិភ័យទីផ្សារ

សំដៅដល់ហានិភ័យដែលជះឥទ្ធិពលដល់ការវិនិយោគហិរញ្ញវត្ថុរបស់ក្រុមហ៊ុនបរធនបាល ដែលបង្កឡើងដោយសារបម្រែបម្រួលឡើងចុះនៃតម្លៃទីផ្សាររបស់អត្រាការប្រាក់ អត្រាប្តូរប្រាក់ និងមូលបត្រដែលអាចជួញដូរបានរួមមាន ភាគហ៊ុន និងសញ្ញាបណ្ណ ជាដើម។

ហានិភ័យដុល

សំដៅដល់ហានិភ័យរួមសរុបដោយរាប់បញ្ចូលទាំងហានិភ័យទីផ្សារ ហានិភ័យឥណទាន និងហានិភ័យប្រតិបត្តិការ។

ហានិភ័យក្នុងការគ្រប់គ្រង

គឺជាហានិភ័យដែលពាក់ព័ន្ធនិងការគ្រប់គ្រងដែលអសមត្ថភាព ឬប្រកបដោយចេតនាឧក្រិដ្ឋ។ ឧទាហរណ៍៖ បញ្ហាណាមួយដែលកើតឡើងដោយចេតនា ដោយអ្នកគ្រប់គ្រង។

ហត្ថលេខាឌីជីថល

ហត្ថលេខាដែលត្រូវបានបង្កើតឡើងតាមមធ្យោបាយអេឡិចត្រូនិកសម្រាប់ប្រើប្រាស់កំណត់អត្តសញ្ញាណរបស់ហត្ថលេខីដែលរួមមាន ហត្ថលេខាអេឡិកត្រូនិក ហត្ថលេខាជីវមាត្រ និងហត្ថលេខាផ្សេងៗ។

ស្វ័យភាព

មានន័យថា សិទ្ធិអំណាច, សេរីភាព ឬសមត្ថភាពរបស់បុគ្គល, ក្រុមស្ថាប័ន ឬរដ្ឋក្នុងការត្រួតត្រា, គ្រប់គ្រង, ចាត់ចែង ឬធ្វើសេចក្តីសម្រេចចិត្តដោយខ្លួនឯង ដោយផ្អែកលើច្បាប់ទម្លាប់របស់ខ្លួន ដោយគ្មានការជ្រៀតជ្រែកពីភាគីដទៃ។

ស្វ័យប្រវត្តិកម្ម

គឺជាការប្រើប្រាស់បច្ចេកវិទ្យា, គ្រឿងម៉ាស៊ីន, កម្មវិធីកុំព្យូទ័រ ឬមនុស្សយន្ត ដើម្បីបំពេញការងារ ឬដំណើរការផលិតកម្មដោយស្វ័យប្រវត្តិ ដោយកាត់បន្ថយការអន្តរាគមន៍ពីមនុស្សឱ្យនៅតិចបំផុត និងជួយបង្កើនផលិតភាព, ភាពជាក់លាក់ និងប្រសិទ្ធភាពការងារ។

ស្ថិរភាពម៉ាក្រូសេដ្ឋកិច្ច

សំដៅដល់ស្ថានភាពនៃសេដ្ឋកិច្ចជាតិ ដែលអាចកាត់បន្ថយភាពងាយរងគ្រោះពីវិបត្តិខាងក្រៅផ្សេងៗ និងជាលទ្ធផលបង្កើនការរំពឹងទុកសម្រាប់កំណើនប្រកបដោយចីរភាព។ ស្ថិរភាពម៉ាក្រូសេដ្ឋកិច្ច ត្រូវបានវាស់វែងដោយអថេរចំនួន ៥ មានដូចជា៖ អតិផរណាទាប និងមានស្ថិរភាពថ្លៃទំនិញ, អត្រាការប្រាក់ទាប និងមានរយៈពេលវែង, បំណុលសាធារណៈមានកម្រិតទាបធៀបនឹង ផ.ស.ស, ឱនភាពទាប, និងស្ថិរភាពរូបិយប័ណ្ណ។

ស្ថិតិពិពណ៌នា

គឺជាប្រភេទស្ថិតិ ដែលសំដៅដល់ការប្រមូល, ការរៀបចំ, ការសង្ខេប និងការបង្ហាញអំពីទិន្នន័យ។

ស្ថាប័នសាមី

ស្ថាប័នសាធារណៈដែលមានសិទ្ធិចុះកិច្ចសន្យា បំពេញតួនាទីជាស្ថាប័ន សាមី រួមមាន ក្រសួង-ស្ថាប័ន, ស្ថាប័នសាធារណៈប្រហាក់ប្រហែល, គ្រឹះស្ថានសាធារណៈរដ្ឋបាល, សហគ្រាសសាធារណៈ និងរដ្ឋបាលថ្នាក់ក្រោមជាតិ។ ស្ថាប័នសាធារណៈទាំងនេះត្រូវបានអនុញ្ញាតឱ្យចុះកិច្ចសន្យា ក្រោមសមត្ថកិច្ចរៀងៗខ្លួន ស្របតាមច្បាប់ និងបទប្បញ្ញត្តិជាធរមាន។

ស្ថាប័នបញ្ញត្តិករ

សំដៅដល់ស្ថាប័ន ដែលទទួលបន្ទុករៀបចំនិងដាក់ឱ្យអនុវត្តបទប្បញ្ញតិ្ត និងគោលការណ៍ ផ្សេងៗ។

ស្តង់ដារវាយតម្លៃ (Valuation Standard)

សំដៅដល់ស្តង់ដារវាយតម្លៃដែលដាក់ឱ្យប្រើប្រាស់នៅព្រះរាជាណាចក្រកម្ពុជា និងទទួលបានការទទួលស្គាល់ឱ្យប្រើប្រាស់ក្នុងការវាយតម្លៃ សម្រាប់ក្រុមហ៊ុនវាយតម្លៃ និងអ្នកជំនាញវាយតម្លៃ។

ស្តង់ដានីយកម្ម

សំដៅដល់សកម្មភាពនៃការបង្កើតនូវបញ្ញាត្តិទាំងឡាយដែលទាក់ទងនឹងបញ្ហាដាក់ស្តែងឬបញ្ហាសំខាន់ៗដើម្បីទុកសម្រាប់ការប្រើប្រាស់ជាទូទៅនិងបន្តបន្ទាប់ សំដៅធានាឱ្យបានដល់ចំណុចប្រសើរបំផុតនៃបរិបទមួយ។

ស្តង់ដានីយកម្ម

គឺជាដំណើរការបង្កើត ឬអនុវត្តនូវស្តង់ដាបច្ចេកទេស ដើម្បីធ្វើឱ្យបច្ចេកវិទ្យាមានគុណភាព សុវត្ថិភាព និងសង្គតិភាព។

ស្តង់ដា

សំដៅដល់ឯកសារដែលត្រូវបានអនុម័តដោយស្ថាប័នមានសមត្ថកិច្ច សម្រាប់ការប្រើប្រាស់ជាទូទៅនិងបន្តបន្ទាប់ ដែលជាវិធានគោលការណ៍ណែនាំឬចរិតលក្ខណៈសម្រាប់ផលិតផលឬដំណើរការពាក់ព័ន្ធ និងវិធីសាស្រ្តផលិតកម្ម ដែលការអនុលោមមិនមានលក្ខណៈតម្រូវឱ្យអនុវត្តនោះទេ។ ស្តង់ដានេះអាចរួមបញ្ចូលឬប្រើប្រាស់សម្រាប់តែការតម្រូវផ្នែកវាក្យសព្ទ និមិត្តសញ្ញាការវេចខ្ចប់ ការធ្វើសញ្ញាសម្គាល់ ឬការធ្វើស្លាកសញ្ញា ដែលអនុវត្តទៅលើផលិតផល ដំណើរការឬវិធីសាស្រ្តផលិតកម្ម។

សេវាហិរញ្ញវត្ថុឌីជីថល

បណ្តាសេវាកម្មហិរញ្ញវត្ថុដែលអាចទទួលបាន និងផ្តល់ឱ្យតាមរយៈបច្ចេកវិទ្យាឌីជីថល ដែលរួមមានការទូទាត់ ឥណទាន ការសន្សំ ការផ្ទេរប្រាក់ និងធានារ៉ាប់រងជាដើម។

សេវារក្សាសុវត្ថិភាព ឬរក្សាទុក

សំដៅដល់ប្រតិបត្តិការដែលក្នុងនោះ ម្ចាស់ទ្រព្យបានប្រគល់ទ្រព្យរបស់ខ្លួនឱ្យទៅធនាគារពាណិជ្ជ ដែលទទួលបានអាជ្ញាបណ្ណឬការអនុញ្ញាតពីនិយ័តករបរធនបាលកិច្ច (ន.ប.ធ.) ធ្វើជាប្រតិបត្តិករបរធនបាលផ្តល់សេវារក្សាសុវត្ថិភាព ឬរក្សាទុក ដើម្បីរក្សាសុវត្ថិភាព ឬរក្សាទុក តាមរយៈការបង្កើតគណនី Escrow ក្នុងគោលបំណងដើម្បីធ្វើការទូទាត់ ឬប្រគល់ទ្រព្យនោះទៅឱ្យបុគ្គលណាមួយ ក្នុងប្រតិបត្តិការធុរកិច្ច ឬក្នុងប្រតិបត្តិការអចលនទ្រព្យ ឬក្នុងប្រតិបត្តិការវិនិយោគនានា នៅពេលកំណត់ជាក់លាក់ណាមួយ តាមលក្ខខណ្ឌដែលបានព្រមព្រៀង។

សេវារក្សាទុក

សំដៅដល់ការផ្ទេរទ្រព្យសម្បត្តិឬមូលនិធិដោយបុគ្គលណាមួយទៅឱ្យបរធនបាលដើម្បីរក្សាទុក ហើយប្រគល់ទៅឱ្យបុគ្គលផ្សេងទៀតឬប្រគល់ត្រឡប់ទៅឱ្យបុគ្គលនោះវិញ តាមលក្ខខណ្ឌដែលបានកំណត់នៅក្នុងលិខិតបរធនបាលកិច្ច។

សេវាកម្មក្លោដ

សេវាកម្មនៃការប្រើប្រាស់កម្មវិធីសុស្វវែរដែលប្រតិបត្តិលើបច្ចេកវិទ្យាក្លោដ។

សេរីភាវូបនីយកម្ម

គឺជាដំណើរការកាត់បន្ថយ ឬលុបបំបាត់របាំងរដ្ឋាភិបាល (ដូចជាពន្ធគយ, កូតា និងការរឹតបន្តឹងការនាំចូល) ដើម្បីលើកទឹកចិត្តឱ្យមានលំហូរសេរីនៃទំនិញ, សេវាកម្ម និងមូលធនឆ្លងកាត់ព្រំដែន។

សេដ្ឋកិច្ចឌីជីថល

សំដៅដល់ការចាប់យកការប្រើប្រាស់នូវភាពរីកចម្រើននៃវិទ្យាសាស្ត្រនិងបច្ចេកវិទ្យាឌីជីថលក្នុងការធ្វើទំនើបកម្មផលិតកម្ម និងការបង្កើនផលិតភាពនិងប្រសិទ្ធភាពសេដ្ឋកិច្ច ដោយបង្កើតចេញនូវគំរូធុរកិច្ចថ្មីៗ, ផ្លាស់ប្ដូរដំណើរការផលិតកម្ម, ផ្លាស់ប្ដូររបៀបធ្វើការថ្មី, ផ្លាស់ប្ដូររបៀបនៃការប្រើប្រាស់និងការចែកចាយទំនិញនិងសេវាជាដើម។

សេចក្តីថ្លែងការណ៍

សំដៅដល់សេចក្តីអះអាងដោយវាចាក្តី ដោយលាយលក្ខណ៍អក្សរក្តី ដែលរៀបរាប់ អំពីអង្គហេតុ អំពីគោលបំណងណាមួយ។

សេចក្តីជូនដំណឹងស្តីពីវិធាន ការហាមឃាត់ជាបណ្តុះអាសន្ន

សំដៅដល់សេចក្តីជូនដំណឹងដែលមានគោលបំណងផ្អាកជាបណ្តោះអាសន្នការផ្គត់ផ្គង់ ការចែកចាយ ឬការចរាចរណ៍លើទីផ្សារនូវប្រភេទទំនិញ ឬសេវាទាំងឡាយដែលមិនមានភាពអនុលោមតាមបទប្បញ្ញត្តិ និងចេញដោយមន្រ្តីស៊ើបអង្កេត។

សុវត្ថិភាពទិន្នន័យ (Data Security)

គឺជាដំណើរការនៃការអនុវត្តបច្ចេកវិទ្យា, គោលនយោបាយ និងវិធានការការពារព័ត៌មានឌីជីថលពីការចូលប្រើប្រាស់ដោយគ្មានការអនុញ្ញាត ការលួច ការកែប្រែ ឬការបំផ្លាញ ក្នុងគោលបំណងសំខាន់គឺដើម្បីធានាបាននូវភាពសម្ងាត់, ភាពត្រឹមត្រូវ និងភាពអាចប្រើប្រាស់បាននៃទិន្នន័យ។

សុខដុមនីយកម្ម

ការកែសម្រួលភាពផ្សេងៗគ្នា និង/ឬភាពមិនស៊ីចង្វាក់គ្នាដែលពាក់ព័ន្ធនឹងការវាស់វែង វិធីសាស្រ្ត នីតិវិធី កាលវិភាគ លក្ខណៈបច្ចេកទេស ឬប្រព័ន្ធដើម្បីធ្វើឱ្យមានឯកភាព ឬមានភាពសមស្របសម្រាប់ទាំងអស់គ្នា។

សុក្រឹត្យភាព

អ្វីដែលគេបានធ្វើដោយសព្វគ្រប់ ឬអ្វីដែលគេពុំអាចបន្ថែមអ្វីទៀតបាន។ ដូចនេះសុក្រឹត្យភាពគឺលក្ខណៈនៃអ្វីដែលប្រជុំគ្រប់គុណសម្បត្តិដោយពុំមានលាយឡំនឹងគុណវិបត្តិ។ ដូចនេះសុក្រឹត្យភាព មានន័យដូចគុណសម្បត្តិ ឬគុណធម៌ដែរ។

សិទ្ធិអ្នកប្រើប្រាស់

សិទ្ធិអ្នកប្រើប្រាស់ សំដៅដល់៖ - សិទ្ធិទទួលបានព័ត៌មាននិងការអប់រំដើម្បីថ្លឹងថ្លែងនូវភាពខុសគ្នារវាងទំនិញឬសេវា និងដើម្បីការពារការក្លែងបន្លំនិងពីការបោកប្រាស់តាមការផ្សាយពាណិជ្ជកម្ម - សិទ្ធិជ្រើសរើសទំនិញឬសេវាដែលមានការប្រកួតប្រជែងគ្នាអំពីថ្លៃនិងគុណភាព - សិទ្ធិត្រូវបានដឹងលឺអំពីកង្វល់និងទទួលការពិនិត្យដោះស្រាយពីបញ្ញត្តិករមានសមត្ថកិច្ចនិងរាជរដ្ឋាភិបាល - សិទ្ធិទាមទារសំណងតាមច្បាប់នេះឬតាមច្បាប់ផ្សេង។

សិទ្ធិលើវត្ថុដែលជាបរធន

បរធនបាលត្រូវមានព័ត៌មានបច្ចុប្បន្នភាពអំពីសិទ្ធិគ្រប់គ្រង, ចាត់ចែង, ប្រើប្រាស់ និងសិទ្ធិអាស្រ័យផល ដែលជាប់មកជាមួយនឹងវត្ថុ មានជាអាទិ៍ សហកម្មសិទ្ធិ, កម្មសិទ្ធិអវិភាគ, សិទ្ធិឃាត់ទុក, សិទ្ធិលើការបញ្ចាំ, ហ៊ីប៉ូតែក, សិទ្ធិប្រាតិភោគដោយអនុប្បទាន, សិទ្ធិជួលអចិន្ត្រៃយ៍, ការធានាកាតព្វកិច្ច (ការធានាបំណុល ឬការជាប់បន្ទុកលើវត្ថុ) និងសិទ្ធិផ្សេងទៀត ដែលមានជាប់មកជាមួយវត្ថុដែលជាបរធនយកមកស្នើសុំបង្កើត និងចុះបញ្ជីបរធនបាលកិច្ច។

សិទ្ធិលើបំណុល

សំដៅដល់សិទ្ធិទទួលបានការទូទាត់សងពីកូនបំណុល ឬការទូទាត់ពីទ្រព្យសកម្មរបស់កូនបំណុលដែលកើតមានឡើងមុនពេលបើកសំណុំរឿងក្ស័យធនដោយមិនគិតពីសិទ្ធិលើបំណុលនោះមានលក្ខខណ្ឌមិនទាន់ទូទាត់បាន ឬមានភាពបន្ទាន់ឡើយ លើកលែងតែច្បាប់ចែងច្បាស់ថាជាសិទ្ធិលើបំណុលខាងរដ្ឋបាល។

សិទ្ធិលើការបញ្ចាំ

សំដៅដល់សិទ្ធិកាន់កាប់វត្ថុដែលបានពីកូនបំណុល ឬតតិយជន ដើម្បីធានាសិទ្ធិលើបំណុលរបស់ខ្លួន និងទទួលសំណងចំពោះសិទ្ធិលើបំណុលរបស់ខ្លួនពីវត្ថុនោះ ដោយមានអាទិភាពជាងម្ចាស់បំណុល ផ្សេងទៀត។

សិទ្ធិប្រាតិភោគប្រត្យក្ស

សំដៅដល់សិទ្ធិប្រត្យក្សមួយប្រភេទ រួមមាន សិទ្ធិឃាត់ទុក, ឯកសិទ្ធិ, សិទ្ធិលើការបញ្ចាំ, ហ៊ីប៉ូតែក និងសិទ្ធិ-ប្រាតិភោគដោយអនុប្បទានដែលត្រូវបានបង្កើតឡើងដើម្បី ធានាកាតព្វកិច្ច។

សិទ្ធិប្រត្យក្ស

សំដៅទៅលើសិទ្ធិគ្រប់គ្រងលើវត្ថុដោយចំពោះ ដែលអាចអះអាងចំពោះបុគ្គលដទៃទៀតបាន។

សិទ្ធិឃាត់ទុក

សំដៅដល់សិទ្ធិប្រាតិភោគប្រត្យក្សមួយប្រភេទរបស់អ្នកកាន់កាប់វត្ថុអ្នកដទៃដែលមានសិទ្ធិលើបំណុលក្នុងការឃាត់ទុកវត្ថុនោះ រហូតដល់ពេលដែលខ្លួនបានទទួលការសងចំពោះសិទ្ធិលើបំណុល។

សាក្សី

សំដៅដល់បុគ្គលដែលត្រូវតុលាការកោះហៅមកសាកសួរនូវហេតុការណ៍ ដែលមានប្រយោជន៍ដល់ការវិនិច្ឆ័យរឿងក្ដី។

សវនកម្ម

សំដៅដល់ការត្រួតពិនិត្យ និងវាយតម្លៃដោយឯករាជ្យ និងជាប្រព័ន្ធលើទិន្នន័យរបាយការណ៍ កំណត់ត្រា កិច្ចប្រតិបត្តិការ និងលទ្ធផលជាហិរញ្ញវត្ថុ ឬមិនមែនហិរញ្ញវត្ថុរបស់សហគ្រាសសម្រាប់គោលបំណងជាក់លាក់ណាមួយ។

សមិទ្ធកម្ម

គឺជាលទ្ធផលជាក់ស្តែងដែលសម្រេចបានពីការអនុវត្តការងារ, កិច្ចការ ឬសកម្មភាពនានា។

សមាហរណកម្ម

គឺជាដំណើរការនៃការរួមបញ្ចូលសមាសធាតុ, តួអង្គ ឬផ្នែកតូចៗឱ្យទៅជាប្រព័ន្ធតែមួយ ដើម្បីសម្របសម្រួលខ្លួន និងកិច្ចសហប្រតិបត្តិការជាមួយក្រុម សង្គម ឬស្ថាប័នធំជាង។

សន្ទនីយភាព

កម្រិតដែលទ្រព្យសកម្ម ឬសញ្ញាបណ្ណ អាចត្រូវបានទិញ ឬលក់នៅក្នុងទីផ្សារ ដោយពុំមានការប៉ះពាល់ដល់តម្លៃទ្រព្យសកម្មនោះ។ សន្ទនីយភាពឆ្លុះបញ្ចាំងពីសមត្ថភាពក្នុងការបម្លែងទ្រព្យសកម្មមួយឱ្យទៅជាសាច់ប្រាក់។

សន្តិសុខសាយប័រ

ការអនុវត្តនៃការទប់ស្កាត់ ការឆ្លើយតប និងការការពារប្រព័ន្ធបច្ចេកវិទ្យាព័ត៌មានរួមទាំងហេដ្ឋារចនាសម្ព័ន្ធ, បណ្តាញ, ប្រព័ន្ធប្រតិបត្តិការ និងកម្មវិធីពីការជ្រៀតចូល និងការវាយប្រហារគ្រប់រូបភាព ជាពិសេសតាមប្រព័ន្ធអ៊ីនធឺណិត។

សន្តិសហវិជ្ជមាន

គឺជាគោលការណ៍នៃការរស់នៅជាមួយគ្នាដោយសន្តិភាព និងកិច្ចសហការផ្ដល់ផលប្រយោជន៍ឱ្យគ្នាទៅវិញទៅមក។

សន្តតិជន

សំដៅដល់ជនដែលទទួលបន្តសិទ្ធិ និងករណីកិច្ចរបស់មតកជនតាមរយៈសន្តតិកម្ម។

សន្តតិកម្ម

សំដៅដល់ការផ្ទេរសិទ្ធិ និងករណីកិច្ចរបស់មតកជនម្នាក់ ឬច្រើននាក់តាមឆន្ទៈ ឬតាមច្បាប់។

សំណើទិញធិនឌ័រ (Tender Offer)

សំដៅដល់សំណើសុំទិញដែលបើកចំហជាសាធារណៈដើម្បីទិញមូលបត្រកម្មសិទ្ធ ឬភាគហ៊ុនរបស់នីតិបុគ្គលណាមួយចាប់ពី ៥ (ប្រាំ) ភាគរយឡើងទៅនៃភាគហ៊ុន ឬមូលបត្រកម្មសិទ្ធឬសំណើសុំទិញដែលមានគោលដៅត្រួតត្រាលើនីតិបុគ្គលណាមួយ។