ចាប់ពីថ្ងៃព្រហស្បតិ៍ ដល់ថ្ងៃសុក្រ ១៣ និង១៤ រោច ខែកត្តិក ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៨ និង ២៩ ខែវិច្ឆិកា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្កមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សា អ.ស.ហ. ឯកឧត្ដម សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) អមដោយ លោក ឃុន វាសនា ប្រធាននាយកដ្ឋានកិច្ចការទូទៅ, លោក ហាយ សុវណ្ណា ប្រធានស្ដីទីនាយកដ្ឋានចុះបញ្ជីបរធនបាលកិច្ច និងលោក ណង សេរីវុធ អនុប្រធាននាយកដ្ឋានស្រាវជ្រាវ បណ្ដុះបណ្ដាល និងសហប្រតិបត្តិការ បានអញ្ជើញធ្វើទស្សនកិច្ចសិក្សា និងប្រជុំពិភាក្សាការងារជាមួយសមាគមបរធនបាល និងក្រុមហ៊ុនបរធនបាល នៅទីក្រុងហុងកុង នៃសាធារណរដ្ឋប្រជាមានិតចិន ដោយមានការសម្របសម្រួលពីក្រុមហ៊ុន ស្ត្រងហូល ត្រាសធី ឯ.ក។ នៅក្នុងដំណើរទស្សនកិច្ចសិក្សារយៈពេលពីរថ្ងៃនេះ គណៈប្រតិភូនៃ ន.ប.ធ. បានជួបប្រជុំពិភាក្សាការងារពាក់ព័ន្ធនឹងបទពិសោធន៍អនុវត្តន៍ ក្របខ័ណ្ឌបទប្បញ្ញត្តិ បរធនបាលកិច្ចគ្រួសារ និងបរធនបាលកិច្ចសម្រាប់ការវិនិយោគ កិច្ចដំណើរការនៃសមាគមបរធនបាល សមាហរណកម្មបច្ចេកវិទ្យា ការអភិវឌ្ឍន៍ទីផ្សារ ការគ្រប់គ្រងហានិភ័យ លទ្ធភាពបង្កើតកិច្ចសហប្រតិបត្តិការ និងការអនុវត្តប្រកបដោយនិរន្តរភាព ក៏ដូចជា ការចែករំលែកអំពីសក្តានុពល និងកាលានុវត្តភាពវិនិយោគក្នុងទីផ្សារបរធនបាលកិច្ចកម្ពុជាផងដែរ ជាមួយសមាគមបរធនបាលហុងកុង, ក្រុមហ៊ុន Morgan Stanley, ក្រុមហ៊ុន Forever Trust Limited និងក្រុមហ៊ុន Printrust Company (Singapore) Limited។ ដំណើរទស្សនកិច្ចខាងលើ ក៏មានថ្នាក់ដឹកនាំ និងមន្រ្តីជំនាញរបស់អង្គភាពសវនកម្មផ្ទៃក្នុងនៃ អ.ស.ហ. ចូលរួមជាមួយផងដែរ ដើម្បីជំរុញការយល់ដឹងបន្ថែមអំពីកិច្ចដំណើរការអភិវឌ្ឍន៍វិស័យបរធនបាលកិច្ច ដល់ក្រុមការងាររបស់អង្គភាពសវនកម្មផ្ទៃក្នុងនៃ អ.ស.ហ.។