នាព្រឹកថ្ងៃចន្ទ ១០រោច ខែកត្តិក ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៥ ខែវិច្ឆិកា ឆ្នាំ២០២៤ និយ័តករបរធនបាលកិច្ច (ន.ប.ធ.) និងធនាគារ អូរៀនថល ម.ក បានសហការគ្នារៀបចំកម្មវិធីបណ្ដុះបណ្ដាលស្តីពី “យន្តការបរធនបាលកិច្ចនៅកម្ពុជា” ក្រោមអធិបតីភាពរបស់ ឯកឧត្តម សុខ ដារ៉ា អគ្គនាយកនៃ ន.ប.ធ. និង Datuk Phan Ying Tong នាយកគ្រប់គ្រង និងជានាយកប្រតិបត្តិនៃធនាគារ អូរៀនថល ម.ក ដែលបានប្រព្រឹត្តទៅនៅទីស្នាក់ការកណ្តាលរបស់ធនាគារ អូរៀនថល ម.ក។ កម្មវិធីបណ្តុះបណ្តាលនេះ ត្រូវបានរៀបចំឡើងក្នុងគោលបំណងបញ្ជ្រាបការយល់ដឹងបន្ថែមអំពីយន្តការបរធនបាលកិច្ចអនុលោមតាមច្បាប់ និងបទប្បញ្ញត្តិនៅកម្ពុជា ដល់ថ្នាក់ដឹកនាំ និងបុគ្គលិកទទួលបន្ទុកមកពីធនាគារ អូរៀនថល ម.ក ដែលជាប្រតិបត្តិករបរធនបាលផ្តល់សេវារក្សាសុវត្ថិភាព ឬសេវារក្សាទុកក្នុងវិស័យបរធនបាលកិច្ចទទួលបានអាជ្ញាបណ្ណពី ន.ប.ធ. ធ្វើប្រតិបត្តិការបរធនបាលកិច្ចពាណិជ្ជកម្ម។