នៅថ្ងៃព្រហស្បតិ៍ ៣រោច ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣០ ខែវិច្ឆិកា ឆ្នាំ២០២៣ និយ័តករបរធនបាលកិច្ច (ន.ប.ធ.) បានរៀបចំកម្មវិធីការងារសង្គមនៅ “មជ្ឈមណ្ឌលកុមារកំព្រាខេត្តសៀមរាប” នៃខេត្តសៀមរាប ក្រោមអធិបតីភាពដ៏ខ្ពង់ខ្ពស់របស់ ឯកឧត្តម សុខ ដារ៉ា អគ្គនាយកនៃ ន.ប.ធ. រួមដំណើរជាមួយដោយ ឯកឧត្តមអគ្គនាយករង នង ពិសិដ្ឋ និងឯកឧត្តម ណី សាកល, ថ្នាក់ដឹកនាំនាយកដ្ឋាននិងសហការីនៃ ន.ប.ធ. ដោយបានពាំនាំយកនូវអំណោយសប្បុរសធម៌ជាគ្រឿងឧបភោគបរិភោគ និងសម្ភារៈមួយចំនួនដូចជា៖ សម្ភារៈសិក្សា សម្ភារៈកីឡា ថ្នាំពេទ្យនិងប្រអប់សង្គ្រោះបឋម សាប៊ូ ច្រាសនិងថ្នាំដុសធ្មេញ អង្ករ មី ត្រីងៀត ត្រីខ ភេសជ្ជៈ ព្រមទាំងគ្រឿងឧបភោគបរិភោគផ្សេងៗទៀត ក៏ដូចជាអាហារសម្រន់ផងដែរ ដើម្បីចែកជូនប្អូនៗកុមារ និងមន្រ្តីបម្រើការងារនៅក្នុងមជ្ឈមណ្ឌល។ នាឱកាសនេះដែរ ឯកឧត្តម សុខ ដារ៉ា ក៏បានសំណេះសំណាល សម្ដែងការកោតសរសើរ ក៏ដូចជាផ្ដល់ការលើកទឹកចិត្ត និងចែករំលែកបទពិសោធន៍ជីវិតដល់ប្អូនៗកុមារ ឱ្យខិតខំសិក្សា និងតស៊ូប្រឹងប្រែងដើម្បីអនាគតរបស់ខ្លួន និងដើម្បីក្លាយជាទំពាំងស្នងឬស្សីដ៏រឹងមាំរបស់សង្គមនាពេលអនាគត។ កម្មវិធីការងារសង្គមនេះត្រូវបានបញ្ចប់ដោយរលូន ក្រោមបរិយាកាសរីករាយ ស្និទ្ធស្នាល និងពោរពេញទៅដោយស្នាមញញឹមនិងក្ដីស្រលាញ់។