ថ្ងៃពុធ ១៤ កើត ខែបុស្ស ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៤ ខែមករា ឆ្នាំ២០២៤ ឯកឧត្ដម សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) បានផ្ដល់កិត្តិយសចូលរួមជាអធិបតីដើម្បីថ្លែងសុន្ទរកថាគន្លឹះ និងជាវាគ្មិនកិត្តិយស ក្នុងសិក្ខាសាលាស្តីពី “កាលានុវត្តភាពអាជីវកម្មដែលកំពុងរីកចម្រើន៖ ការអភិវឌ្ឍន៍នៃវិស័យបរធនបាលកិច្ចនៅកម្ពុជា” ដែលរៀបចំដោយសភាពាណិជ្ជកម្មអាមេរិកនៅកម្ពុជា (AmCham) នៅសណ្ឋាគារ ហៃយ៉ាត់ រីជិនស៊ី ភ្នំពេញ។ សិក្ខាសាលានេះមានគោលបំណងដើម្បីប្រមូលផ្តុំអ្នកជំនាញ និងតួអង្គពាក់ព័ន្ធក្នុងទីផ្សារបរធនបាលកិច្ច ដើម្បីលើកកម្ពស់ការយល់ដឹង​ពីសារៈសំខាន់ និងអត្ថប្រយោជន៍របស់បរធនបាលកិច្ច ដែលជាយន្តការសម្រាប់ការគ្រប់គ្រង ចាត់ចែង និងថែរក្សាទ្រព្យសម្បត្តិ ប្រកបដោយទំនុកចិត្ត។