នារសៀល ថ្ងៃសៅរ៍ ១រោច ខែមិគសិរ ព.ស. ២៥៦៩ ត្រូវនឹងថ្ងៃទី៦ ខែធ្នូ ឆ្នាំ២០២៥ ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) បានអញ្ជើញចូលរួមជាគណៈអធិបតីក្នុងពិធីប្រគល់-ទទួលអគារសិក្សា ១ខ្នង មាន២បន្ទប់ និងគ្រឿងសង្ហារឹមគ្រប់បន្ទប់ ព្រមទាំងដងទង់ជាតិ នៅសាលាបឋមសិក្សា រំលេច ដែលស្ថិតនៅភូមិបឹងរំលេច ឃុំក្រពើពីរ ស្រុកវាលវែង ខេត្តពោធិ៍សាត់ ក្រោមការឧបត្ថម្ភថវិកាសាងសង់របស់បរធនបាលកិច្ចហិរញ្ញវត្ថុ អមតៈ។ ក្នុងពិធីប្រគល់-ទទួលអគារសិក្សានេះ ក៏មានការចូលរួមពីលោក ជា ផល្លារិន បរធនបាលរូបវន្តបុគ្គលឯករាជ្យនៃបរធនបាលកិច្ចហិរញ្ញវត្ថុ អមតៈ, លោក ធាង ឡេង អភិបាលនៃគណៈអភិបាលស្រុកវាលវែង, ប្រធាន និងមន្រ្តីនៃការិយាល័យអប់រំ យុវជន និងកីឡាស្រុកវាលវែង អជ្ញាធរ និងប្រជាការពារភូមិបឹងរំលេច គណៈគ្រប់គ្រង និងលោកគ្រូអ្នកគ្រូសាលាបឋមសិក្សារំលេច ព្រមទាំងសិស្សានុសិស្ស និងមាតាបិតាសិស្ស។ សំណង់អគារសិក្សាដ៏ស្អាត និងមានសោភ័ណភាពនេះ ត្រូវបានរចនាឡើងដោយគិតគូគ្រប់ជ្រុងជ្រោយពីពន្លឺ និងខ្យល់។ នាឱកាសនោះឯកឧត្តម សុខ ដារ៉ា បានមានប្រសាសន៍ពីសារៈសំខាន់នៃការអប់រំ និងបានអំពាវនាវឱ្យមាតា-បិតារបស់សិស្សបញ្ជូនកូនមកចូលរៀននៅសាលាបឋមសិក្សារំលេចឱ្យបានចប់ថ្នាក់ ដើម្បីអនាគតរបស់ក្មេងៗ និងធនធានមនុស្សសម្រាម់កម្ពុជា និងចូលរួមថែរក្សាអគារសិក្សាថ្មីនេះ ឱ្យបានគង់វង្សយូរអង្វែង ដើម្បីរក្សាទុកសម្រាប់ក្មេងៗជំនាន់ក្រោយបានចូលរៀន ក៏ដូចជាកសាងការជឿជាក់ដល់ម្ចាស់ជំនួយ សំដៅជំរុញលើកទឹកចិត្តឱ្យមានការបន្តជួយសាងសង់អគារទាំងនេះ នៅតាមគ្រឹះស្ថានសិក្សា និងសហគមន៍ផ្សេងៗទៀត។