នាព្រឹកថ្ងៃអង្គារ ១២ កើត ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២ ខែធ្នូ គ.ស.២០២៥ ឯកឧត្ដម សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) អមដោយសហការី បានទទួលការជួបសម្តែងការគួរសម និងពិភាក្សាការងារជាមួយប្រតិភូវិភាគទានច្បាប់ ដឹកនាំដោយលោកស្រី ទេព បូផល ស្ថាបនិកវិភាគទានច្បាប់ និងសហអ្នកនិពន្ធ នៃគម្រោងសរសេរសៀវភៅ “នីតិសន្តតិកម្ម។ ជំនួបនេះ រៀបចំឡើងក្នុងគោលបំណងបញ្ចូលយន្តការ និងទស្សនទាននៃបរធនបាលកិច្ច ទៅក្នុងសៀវភៅនីតិសន្តតិកម្ម ដោយបន្ស៊ីរបបសន្តតិកម្មនៃក្រមរដ្ឋប្បវេណី ជាមួយបរធនបាលកិច្ចគ្រួសារក្នុងវិស័យបរធនបាលកិច្ច។ ជាលទ្ធផលនៃជំនួបនេះ ន.ប.ធ. និងវិភាគទានច្បាប់ បានគាំទ្រឲ្យបន្តកិច្ចសហប្រតិបត្តិក្នុងក្របខណ្ឌ៖ ១. បន្តពង្រឹងកិច្ចសហប្រតិបត្តិការបន្ថែមទៀត ដោយសិក្សាលទ្ធភាពនៃការចុះអនុស្សរណៈយោគយល់គ្នា(MOU)រវាង ន.ប.ធ. និងវិភាគទានច្បាប់ ២. រៀបចំសិក្ខាសាសា ឬវគ្គបណ្តុះបណ្តាលអំពីច្បាប់ពាក់ព័ន្ធនឹងសន្តតិកម្ម និងបរធនបាលកិច្ចគ្រួសារឱ្យកាន់តែទូលំទូលាយ ៣. ទទួលនិស្សិតរបស់វិភាគទានច្បាប់ចូលរួមការបណ្តុះបណ្តាលរបស់ ន.ប.ធ.ដើម្បីសិក្សាអំពីវិស័យបរធនបាលកិច្ច ក៏ដូចជា ការចែករំលែក និងផ្សព្វផ្សាយក្របខណ្ឌច្បាប់ស្តីពីបរធនបាលកិច្ចក្នុងកម្មវិធីនានារបស់វិភាគទានច្បាប់ ៤.បង្កើតជំនួបប្រជុំពិភាក្សាជាមួយក្រុមវិនិយោគិន ធុរជន អ្នកវិជ្ជាជីវៈសេរី និងបរធនបាល ពាក់ព័ន្ធនឹងសន្តតិកម្ម និងបរធនបាលកិច្ចគ្រួសារ។