នាថ្ងៃព្រហស្បតិ៍ ១៣កើត ខែស្រាពណ៍ ឆ្នាំម្សាញ់ ព.ស.២៥៦៩ ត្រូវនឹងថ្ងៃទី៧ ខែសីហា គ.ស.២០២៥, ក្នុងស្មារតីសាមគ្គីជាតិខ្មែរ ខ្មែរជួយខ្មែរ និងដើម្បីចូលរួមចំណែកជាមួយរាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា, ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) ព្រមទាំងសហការីនៃ ន.ប.ធ. និងសប្បុរសជនក្នុងវិស័យបរធនបាលកិច្ច បានចុះសួរសុខទុក្ខ និងនាំយកអំណោយគ្រឿងឧបភោគបរិភាគ និងសម្ភារប្រើប្រាស់ចាំបាច់មួយចំនួន ដេីម្បីចែកជូនដល់បងប្អូនប្រជាពលរដ្ឋខ្មែរភៀសសឹកពីតំបន់មានជម្លោះព្រំដែនកម្ពុជា-ថៃ ចំនួន ៥៣០ គ្រួសារ ដែលកំពុងស្នាក់នៅបណ្តោះអាសន្ននៅទីតាំងសុវត្ថិភាព ព្រមទាំងផ្តល់ថវិកាគាំទ្រជូនព្រះសង្ឃ, លោកគ្រូ-អ្នកគ្រូ ដែលបន្តស្ម័គ្រចិត្តមកបង្រៀនចល័ត, កងកម្លាំងឈរជេីងប្រចាំការ, និងក្រុមការងារ ស្ថិតនៅភូមិសាស្រ្តភៀសសឹកខេត្តព្រះវិហារ។ ក្នុងនាមថ្នាក់ដឹកនាំ និងមន្ត្រីនៃ ន.ប.ធ. និងសប្បុរសជនក្នុងវិស័យបរធនបាលកិច្ច សូមចូលរួមចំណែកដោយដួងចិត្តស្មោះស្ម័គ្រ និងសូមបង្ហាញពីការប្តេជ្ញាចិត្តខ្ពស់ចំពោះទំនួលខុសត្រូវសង្គម សាមគ្គីភាព ស្មារតីខ្មែរតែមួយ គ្រប់កាលៈទេសៈ និងសហការគ្នាយ៉ាងស្វាហាប់ ដ៏មុតមាំ ដោយក្តីមោទនភាព ចំពោះគុណវីរភាពកងទ័ពកម្ពុជានៃការលះបង់យ៉ាងធំធេងមិនអាចកាត់ថ្លៃបានដើម្បីការពារជាតិមាតុភូមិកម្ពុជាពីខ្មាំងសត្រូវ។