នាថ្ងៃពុធ ១២កើត ខែស្រាពណ៍ ឆ្នាំម្សាញ់ ព.ស.២៥៦៩ ត្រូវនឹងថ្ងៃទី៦ ខែសីហា គ.ស.២០២៥ ឯកឧត្តម សុខ ដារ៉ា អគ្គនាយក​នៃនិយ័តករបរធនបាលកិច្ច (ន.ប.ធ.) និងសហការី​ ព្រមទាំងសប្បុរសជនក្នុងវិស័យបរធនបាលកិច្ច បានចុះសាកសួរសុខទុក្ខ និងនាំយកអំណោយ ជូនដល់វីរកងទ័ពជួរមុខ​ ដែលបានរងរបួស និងកំពុងសម្រាកព្យាបាលនៅមណ្ឌលសុខភាពគូលែន​ និង​មន្ទីរពេទ្យបង្អែកខេត្ត ១៦មករា នៃខេត្តព្រះវិហារ ក្នុងកំឡុងពេលប្រយុទ្ធការពារអធិបតេយ្យជាតិ​ បូរណភាពទឹកដី ពីការឈ្លានពានរបស់​ក្រុមចោសៀម។ ដំណេីរចុះសួរសុខទុក្ខនាពេលនេះ​ ធ្វេីឡេីងក្នុងស្មារតីសាមគ្គីជាតិ «ខ្មែរជួយខ្មែរ» និងដើម្បីរួមចំណែកជាមួយរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា​ ព្រមទាំងបង្ហាញអោយឃេីញពីការដឹងគុណចំពោះវីរភាពដ៏អង់អាចក្លាហាន​របស់កងទ័ពកម្ពុជានូវការលះបង់យ៉ាងធំធេងមិនអាចកាត់ថ្លៃបាន ដើម្បីការពារជាតិមាតុភូមិកម្ពុជាពីខ្មាំងសត្រូវ។