នាព្រឹកថ្ងៃអង្គារ ១៤រោច ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៤ ខែមិថុនា គ.ស.២០២៥ និយ័តករបរធនបាលកិច្ច (ន.ប.ធ.) បានរៀបចំកម្មវិធីសិក្ខាសាលា ស្តីពី “កិច្ចពិភាក្សានិងប្រមូលធាតុចូលពាក់ព័ន្ធនឹងគំនិតផ្តួចផ្តើមក្នុងការបង្កើតសមាគមបរធនបាលកម្ពុជា” ក្រោមអធិបតីភាពរបស់ ឯកឧត្តម សុខ ដារ៉ា អគ្គនាយកនៃ ន.ប.ធ. អមដោយថ្នាក់ដឹកនាំ និងមន្ដ្រីជំនាញនៃ ន.ប.ធ. និងមានការចូលរួមពីក្រុមហ៊ុនបរធនបាល បរធនបាលរូបវន្ដបុគ្គល និងប្រតិបត្តិករបរធនបាលផ្តល់សេវារក្សាសុវត្ថិភាព ឬសេវារក្សាទុក (Escrow Services) ដើម្បីចូលរួមផ្តល់ធាតុចូលលើការងារបង្កើតសមាគមបរធនបាលកម្ពុជា នៅទីស្តីការរបស់អាជ្ញាធរសេវាហិរញ្ញវត្ថុមិនមែនធនាគារ។ កម្មវិធីនេះបានផ្ដោតជាសំខាន់លើការពិគ្រោះយោបល់ពាក់ព័ន្ធនឹងការរៀបចំនិងការប្រព្រឹត្តទៅរបស់សមាគម និងអត្ថប្រយោជន៍នៃការបង្កើតឱ្យមានសមាគមបរធនបាលកម្ពុជា ដែលក្នុងនោះមានដូចជា៖ ការពង្រឹងកិច្ចសហការរវាងគ្នាទៅវិញទៅមក, ការលើកកម្ពស់វិជ្ជាជីវៈ, ការលើកកម្ពស់ការយល់ដឹងជាសាធារណៈ និងការជំរុញការអភិវឌ្ឍវិស័យបរធនបាលកិច្ចនៅកម្ពុជា។ នៅក្នុងកម្មវិធីនេះ ប្រតិបត្តិករ និងភាគីពាក់ព័ន្ធទាំងអស់ បានបង្ហាញក្ដីសោមនស្សរីករាយ និងឯកភាពជាឯកឆន្ទៈក្នុងការគាំទ្រគំនិតផ្ដួចផ្ដើមនៃការបង្កើតសមាគមបរធនបាលកម្ពុជា ក៏ដូចជារីករាយក្នុងការសម្របសម្រួលផ្ដល់កិច្ចសហការក្នុងដំណើរការនៃការបង្កើតសមាគមនាពេលឆាប់ៗខាងមុខ ផងដែរ។