នាព្រឹកថ្ងៃចន្ទ ១០កើត ខែចេត្រ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី៧ ខែមេសា ឆ្នាំ២០២៥ និយ័តករបរធនបាលកិច្ច (ន.ប.ធ.) បានរៀបចំសិក្ខាសាលាផ្សព្វផ្សាយអំពី "ប្រកាសស្ដីពីវិធាន និងនីតិវិធីសារពើពន្ធចំពោះបរធនបាលកិច្ច” ក្រោមអធិបតីភាពរបស់ឯកឧត្តម សុខ ដារ៉ា អគ្គនាយកនៃ ន.ប.ធ. នៅសណ្ឋាគារ សុខា ភ្នំពេញ។ សិក្ខាសាលានេះរៀបចំឡើងដើម្បីផ្សព្វផ្សាយអំពី "ប្រកាសស្ដីពីវិធាន និងនីតិវិធីសារពើពន្ធចំពោះបរធនបាលកិច្ច" ដែលបានចូលជាធរមានកាលពីថ្ងៃទី១២ ខែមីនា ឆ្នាំ២០២៥ កន្លងទៅនេះ។ ប្រកាសនេះកំណត់អំពីបែបបទ និងនីតិវិធីក្នុងការអនុវត្តសារពើពន្ធចំពោះបរធនបាលកិច្ច ដោយមិនបង្កើតថ្មី ឬបន្ថែម ឬការកំណត់របបពន្ធដោយឡែកពីរបបសារពើពន្ធ ដែលមានរួចស្រេចនោះទេ។ ដើម្បីសម្រួលដល់ការអនុវត្ត ប្រកាសនេះបានកំណត់ឱ្យបរធនបាល ជាអ្នកប្រកាសពន្ធជំនួស បរធនបាលទាយក និងអត្ថគាហកៈ។ ហើយប្រកាសនេះក៏បានចូលរួមលើកម្ពស់អភិបាលកិច្ចល្អ និងបង្កើនទំនុកចិត្តវិនិយោគិន ដោយតម្រូវឱ្យបរធនបាលកាន់បញ្ជិកាគណនេយ្យដាច់ដោយឡែកៗពីគ្នា សម្រាប់បរធនបាលកិច្ចនីមួយៗ ដែលបង្កើត និងចុះបញ្ជី។ សិក្ខាសាលានេះ មានការអញ្ជើញចូលរួមពីតំណាងរបស់អគ្គនាយកដ្ឋានពន្ធដារ និងមន្រ្តីជំនាញ នៃអគ្គនាយកដ្ឋានពន្ធដារ, និងថ្នាក់ដឹកនាំនិងមន្រ្តីនៃ ន.ប.ធ., ព្រមទាំងថ្នាក់ដឹកនាំ និងបុគ្គលិកទទួលបន្ទុកពាក់ព័ន្ធរបស់ក្រុមហ៊ុនបរធនបាល, ប្រតិបត្តិករបរធនបាលផ្ដល់សេវារក្សាសុវត្ថិភាព ឬរក្សាទុកក្នុងវិស័យបរធនបាលកិច្ច, បរធនបាលរូបវន្តបុគ្គលឯករាជ្យ, ក្រុមហ៊ុនវាយតម្លៃក្នុងវិស័យបរធនបាលកិច្ច និងក្រុមហ៊ុនផ្ដល់សេវាសវនកម្ម សរុបចំនួន១៩១ រូប។