តាមរយៈគំនិតផ្តួចផ្តើមការងារសង្គម ក្រោមប្រធានបទ "សងត្រឡប់ដល់សង្គម និងសហគមន៍វិញ" របស់និយ័តករបរធនបាលកិច្ច (ន.ប.ធ.), ឯកឧត្តម សុខ ដារ៉ា អគ្គនាយកនៃ ន.ប.ធ. បានផ្ដួចផ្ដើមគំនិតកសាងអគារសិក្សាថ្មីនៅសាលាបឋមសិក្សា ១ ខ្នង ៤ បន្ទប់ បំពាក់ដោយបរិក្ខា ព្រមទាំងបន្ទប់ទឹកអនាម័យ ដែលមានទីតាំងស្ថិតនៅភូមិប្រឡាយទ្រៀក ឃុំដំរីផុង ស្រុកឆ្លូង ខេត្តក្រចេះ ព្រមទាំងបានសម្ពោធដាក់ឱ្យប្រើប្រាស់ នាព្រឹកថ្ងៃអាទិត្យ ១៤កើត ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១២ ខែមករា ឆ្នាំ២០២៥។ កម្មពិធីសម្ពោធនាព្រឹកនេះ មានការចូលរួមពី លោកស្រីអភិបាលស្រុកឆ្លូង, លោកប្រធានការិយាល័យអប់រំស្រុកឆ្លូង, លោកស្រីមេឃុំដំរីផុង និងអាជ្ញាធរពាក់ព័ន្ធ ព្រមទាំងប្រជាជនក្នុងភូមិប្រឡាយទ្រៀក ក៏ដូចជាមាតា បិតា អាណាព្យាបាល និងសិស្សានុសិស្សផងដែរ។ ការសាងសង់អគារសាលាបឋមសិក្សាថ្មី​ជំនួសឱ្យអគារសាលាបឋមសិក្សាចាស់ដែលទ្រុឌទ្រោមនេះ ទទួលបានការចូលរួមឧបត្ថម្ភគាំទ្រពី​ បរធនបាលកិច្ចហិរញ្ញវត្ថុហត្ថាកសិករ, បរធនបាលកិច្ចហិរញ្ញវត្ថុប្រាសាក់, និងបរធនបាលកិច្ចហិរញ្ញវត្ថុក្រេឌីត។ ជាមួយគ្នានេះ ក្រុមការងារ ក៏បានផ្ដល់សម្ភារៈសិក្សាមួយចំនួន ដល់សិស្សានុសិស្សផងដែរ។